Երեկ լուր տարածվեց, որ թուրքական հատուկ ծառայությունները ձերբակալել են Վանի քաղաքապետ Քայաին, նրան մեղադրելով Քրդական աշխատավորական կուսակցության հետ կապ ունենալու մեջ։ Այս տեղեկությունը մեզ համար հետաքրքրական էր այնքանով, որ Հայաստանում առաջիկա օրերին սպասում էին նրա այցին։ Վանի քաղաքապետին Հայաստան էր հրավիրել ԲՀԿ խմբակցության անդամ Արագած Ախոյանը, ով, նախորդ տարի լինելով Վանում, քաղաքապետի հետ պայմանավորվածություն էր ձեռք բերել Վանում բացել Հայկական մշակութային կենտրոն։ Երեկ մենք փորձեցինք պարոն Ախոյանից ճշտել, թե նա ինչպես է վերաբերվում այս ձերբակալությանը։ «Ինձ համար եւս այս ձերբակալությունն անակնկալ էր, քանի որ մենք նրան հրավերք էինք ուղարկել գալու Հայաստան, որտեղ ավելի կոնկրետ պետք է պայմանավորվածություն ձեռք բերվեր Հայկական մշակութային կենտրոնի բացման վերաբերյալ։ Սակայն անակնկալ լուր ստացա, որ քաղաքապետը ձերբակալված է։ Հույս ունեմ, որ թյուրիմացությունը կպարզվի, եւ նա ազատ կարձակվի»։
Մենք պարոն Ախոյանին հարցրինք, թե հնարավո՞ր է, որ այս ձերբակալությունն առնչվի ոչ թե Քրդական աշխատավորական կուսակցության, այլ հայկական կազմակերպությունների հետ ունեցած կապերին։ Հնարավո՞ր է, որ նրան կալանավորել են Վանում Հայկական մշակութային կենտրոնի բացմանը խոչընդոտելու համար։ «Ես չեմ կարող ասել, թե ինչն է պատճառը, մանավանդ նման բան պնդելու համար ոչ մի ապացույց չունեմ։ Սպասենք-տեսնենք, թե ինչ կպարզի հետաքննությունը»:
«Հրապարակ»
Կարդացեք նաև
