Լրագրողների հետ հանդիպումը մարզաձեւի հանրապետական ֆեդերացիայի` վերջերս ընտրված նախագահ Կարեն Գյունաշյանը սկսեց մի պատմությունով, ըստ որի՝ վերջին մի քանի ամիսներին հայկական մամուլում եւ ինտերնետային կայքերում մարզաձեւի շուրջ իրարանցում է սկսվել, որը տարածվել է նաեւ աշխարհով մեկ: «Ինձ, անկեղծ ասած, ուրախացնում է, որ հանրապետությունում եւ աշխարհում խոսում են հայկական ջրագնդակի մասին, հետաքրքրվում: Այսինքն՝ ջրագնդակը չի մոռացվել: Բայց մտահոգում է այն, որ նախագահ ընտրվելուց հետո դրանցում իմ, վետերան ջրագնդորդների եւ արժանավոր մյուս մարդկանց հասցեին անհիմն վիրավորանքներ են հնչեցվում», – ասաց Կ. Գյունաշյանը: Նրա խոսքերով, այս ամենը սկսվել է այն բանից հետո, երբ ջրագնդորդներն անվստահություն հայտնեցին ֆեդերացիան մի քանի ամիս ղեկավարած Գագիկ Հովհաննիսյանին` նրա փոխարեն ընտրելով իրեն:
«Ամեն բան սկսվեց այն բանից հետո, երբ իմ հարցազրույցներից մեկում հայտարարեցի, թե պարոն Հովհաննիսյանը խեղաթյուրել է ջրագնդակի պատմությունը եւ տվել որպես Հայաստանում մարզաձեւի հիմնադիրների ու երախտավորների իր ուզած կամ իմացած մարդկանց անունները` անտեսելով մեզանում մարզաձեւի իրական հիմնադիրներին ու երախտավորներին: Ես ֆեդերացիայի նախկին ղեկավարի հետ ոչ մի խնդիր չունեմ: Ընդհակառակը, բազմիցս առաջարկել եմ միասին աշխատել: Բայց նա մերժել է», – ասաց ֆեդերացիայի նոր նախագահը:
Լրագրողների հարցին, թե ո՞րն է ասուլիսը հրավիրելու գլխավոր դրդապատճառը եւ ինչո՞վ կարող են ֆեդերացիային օգտակար լինել, պարոն Գյունաշյանը պատասխանեց, որ Գագիկ Հովհաննիսյանը մինչեւ հիմա չի հանձնում ֆեդերացիայի կնիքը եւ գույքը, որպեսզի կարողանան աշխատանքները կազմակերպել: «Մենք հիմա հրավերներ ունենք մի քանի այլ երկրներից, բայց օրինական կարգով մեկնել չենք կարող: Եթե մտնենք, օրինակ, Վրաստանի դեսպանատուն, այնտեղ չե՞ն ասի` այս ի՞նչ եք անում», – դժգոհեց Կարեն Գյունաշյանը:
Կարդացեք նաև
Լրագրողները հուշեցին, որ նման դեպքերում պետք է դիմել նախարարություն, Ազգային օլիմպիական կոմիտե, վերջապես՝ մարզաձեւի միջազգային ֆեդերացիա, որին ֆեդերացիայի նախագահը պատասխանեց. «Մենք մինչեւ հիմա մտածել ենք, որ հարցը կլուծվի առանց ավելորդ քաշքշուկների: Սակայն արդեն ստիպված պիտի գնանք ձեր նշած ճանապարհով»:
Ամբողջ ասուլիսում բանախոսը եւ նրա հետ եկած գործընկերները կարոտով հիշեցին սկսած 50-ական թվականներից հայկական ջրագնդակի հարուստ անցյալը, սակայն մարզաձեւի ներկայիս հոգսերի եւ դրանք լուծելու իրենց կոնկրետ ծրագրերի մասին խոսելու ժամանակ չեղավ:
Աշոտ ՀԱԿՈԲՅԱՆ
