ՀՀԿ-ում ոգեւորություն է տիրում: «Առավոտի» տեղեկություններով՝ ոգեւորության պատճառն այն է, որ ՀՀ եւ ՀՀԿ ղեկավարությունը միաժամանակ աշխարհաքաղաքական երեք կարեւոր կենտրոններից դրական «մեսիջներ» է ստացել: Փաստորեն՝ եւ ԱՄՆ-ը, եւ Եվրոպան, եւ Ռուսաստանն ակնարկեցին, որ առաջիկայում ՀՀ իշխանությունն ընդունելի է լինելու իրենց համար: Մասնավորաբար, ԱՄՆ պետքարտուղար Քլինթոնը Հայաստանում գովերգում էր Սերժ Սարգսյանին՝ ասելով, որ Միացյալ Նահանգները պատրաստակամ է օժանդակել եւ աջակցել Հայաստանի նախագահի շարունակական գործունեությունը՝ որպես հիանալի առաջնորդ: Բառացիորեն նույն ժամանակ Եվրոպայում ընդունում եւ գովերգում էին Տիգրան Սարգսյանին՝ ի դեմս ԵԺԿ նախագահ Մարթենսի, ով մեկ անգամ եւս շնորհավորեց խորհրդարանական ընտրություններում ՀՀԿ տարած հաղթանակի եւ ընտրությունները բարձր մակարդակով անցկացնելու առիթով: Միաժամանակ, ՀՀԿ-ում շոյված եւ ուրախ են նաեւ ռուսական ժեստից. Տիգրան Սարգսյանի հրաժարականից մեկ օր առաջ ՌԴ վարչապետ Դմիտրի Մեդվեդեւը հանդիպեց Հայաստանի վարչապետին, քննարկեց հետագա համագործակցությունը եւ համատեղ ծրագրերը:
«Առավոտ» օրաթերթ
