Կապանի ծայրամասային Վաչագան թաղամասի անհատական տներից մեկի տանիքում օձ է հայտնաբերվել: Վաչագան թաղամասի թիվ 133 տան բնակչուհի տիկին Հեղինեն իրենց տան տանիքում օձը տեսել էր դեռեւս կիրակի օրը, երբ թռչունների տարօրինակ անվերջ ձայներից մի քանի անգամ ներս ու դուրս անելուց հետո վերջապես նկատել էր, որ տանիքից մոտ 1 մետր երկարությամբ օձ է կախված: «Ես առաջին անագամ եմ իմ կյանքում օձ տեսնում ու շատ վախեցա: Մեր տունն այնպիսի տարածքում է, որ ծիտիկների ձայնը երաժշտության նման միշտ լսվում է, բայց այս անգամ թռչունների ծլվլոցն արդեն երաժշտության նման չէր. այդ ձայների մեջ անհանգստություն կար, մի տեսակ եւ տաօրինակ ձեւով բոլորը հավաքվել էին սալորի ծառի վրա, որտեղ բույն էին դրել: Մոտ 5-6 անագամ այդ ձայների վրա դուրս եկա, ոչինչ չնկատեցի: Վերջին անգամ դուրս գալուց տեսա, որ օձը կախված է տանիքից` դեպի թռչունի բույնը եւ ձագը բերանում տանում է: Տանը մենակ էի, հետո աղջիկս եկավ, պատուհանները պինդ փակեցինք, որ օձը ներս չմտնի: Ամուսնուս տեղյակ պահեցի, բայց նրան չհաջողվեց օձին հանել տանիքից: Ամբողջ գիշեր անհանգիստ քնեցինք: Լսել էի, որ օձին ձեռք չտալու դեպքում նա չի վնասի, ու մի կողմից մի քիչ հագիստ էինք: Նաեւ մեծերից լսել էի, որ օձ տեսնելիս ջուր են լցնում ամանով դնում, որ խմի գնա, մի քանի տեղ ջուր լցրեցի եւ դրեցի», -պատմում է Վաչագան թաղամասի բնակչուհի Հեղինե Նազարեթյանը: Կիրակի օրն անհանգիստ լուսացնելուց հետո նրանք դիմել էին փրկարար ծառայություն: Ահազանգ ստանալուց հետո այսօր դեպքի վայր է մեկնել հրշեջ-փրկարարական ջոկատի օպերատիվ խումբը, հայտնաբերել օձին եւ տեղափոխել անվտանգ տարածք:
Մերի ՍՈՂՈՄՈՆՅԱՆ
