Լեյտենանտ Արտակ Նազարյանի մահվան գործով հունիսի 5-ի նիստը կարծես հայոց լեզվի քննություն ուներ: Վկա Արթուր Մկրտչյանի հարցաքննության ժամանակ տուժողի իրավահաջորդ Ծովինար Նազարյանը, ամբաստանյալ զինծառայողների պաշտպանները վկայի նախաքննական ցուցմունքներից արտահայտություններ էին մեջբերում, որոնց իմաստը 8-ամյա կրթությամբ Արթուրը չգիտեր: Վկան չէր կարողանում բացատրել ռազմական ոստիկանությունում՝ անազատության ավելի քան 20 օրվա ընթացքում, տված իր ցուցմունքներում առկա «ի չիք», «հորդորել», «զուգորդել», «բնորոշիչ» եւ այլ բառերի իմաստը: Վկան հարցերին պատասխանելիս մեծ մասամբ ասում էր՝ չգիտեմ:
Ա. Մկրտչյանն ասաց, որ նախկինում ինքը երկու անգամ սուտ է խոսել: Առաջինն այն ժամանակ, երբ գրություն է գրել՝ այնտեղ նշելով, թե ամբաստանյալ 3 զինվորների դեմ ինքը մեղադրական բնույթի ցուցմունքները տվել է ռազմական ոստիկանությունում քննիչների ճնշման եւ ծեծի հետեւանքով: Վկայի խոսքերով՝ երկրորդ սուտը 2011թ. դեկտեմբերի 14-ին տված իր հարցազրույցն է «Ազատություն» ռադիոկայանի թղթակից Նաիրա Բուլղադարյանին: Այս հարցազրույցում եւս վկան ասել է իր նկատմամբ ռազմական ոստիկանության եւ գործով քննիչի գործադրած սպառնալիքների ու ծեծի մասին: Դատարանում վկան հայտնեց, որ սույն հարցազրույցը տվել է ամբաստանյալների ծնողների ճնշման տակ: Այդ հարցազրույցը տեսագրել է նաեւ Հելսինկյան ընկերակցության լրագրող Արման Վեզիրյանը: Իրավապաշտպան Ռուբեն Մարտիրոսյանը դատարանին միջնորդեց Արման Վեզիրյանի տեսագրած սույն հարցազրույցը որպես ապացույց կցել քրեական գործին եւ հետազոտել: Իրավապաշտպանի համոզմամբ՝ դրա արդյունքում պարզ կդառնա, որ վկան ազատ, անկաշկանդ ձեւով է տվել այդ հարցազրույցը: Միջնորդությանը կողմ էին ամբաստանյալները եւ նրանց պաշտպանները, իսկ մեղադրողներ Հայկ Հարոյանը եւ Հարություն Հարությունյանը դեմ արտահայտվեցին: Ամբաստանյալ կապիտան Հակոբ Մանուկյանի պաշտպան Հրանտ Գեւորգյանն իր ելույթում ուշադրություն հրավիրեց այն հանգամանքի վրա, որ գործով բոլոր 4 վկաները Բերդի ռազմական ոստիկանությունում ցուցմունքներ են տվել՝ տեւական ժամանակ գտնվելով անազատության մեջ, նրանք դատարանում չեն հիշում իրենց նախաքննական ցուցմունքները, բոլոր 4 վկաներն անհիմն կերպով գտնվել են նրանց նկատմամբ կիրառված «պաշտպանական միջոցի» ճնշման տակ, եւ որ ներկայումս էլ վկաները ռազմական ոստիկանության եւ ոստիկանության ճնշման ներքո են: Դատավոր Սամվել Մարդանյանը բավարարեց տեսաերիզի վերաբերյալ միջնորդությունը: Դատական հաջորդ նիստում, որը կկայանա հունիսի 6-ին, կհետազոտվի 23 րոպեանոց այդ տեսագրությունը:
Ոսկան ՍԱՐԳՍՅԱՆ
