Այսօր լրագրողները Գյումրի այցելած տարածքային կառավարման նախարարի եւ փոխվարչապետի պաշտոնակատար Արմեն Գևորգյանից հետաքրքրվեցին, թե նա շարունակելո՞ւ է զբաղեցնել նույն պաշտոնը, որին ի պատասխան պաշտոնյան կարճ կապեց . «Երբ որ որոշումները կլինեն, կհրապարակվեն, դուք էլ կիմանաք»:
Իսկ որ նա հաստատ շարունակելու է պաշտոնավարել, այս հարցում գոնե գյումրեցի լրագրողները կասկած չունեն: Նկատենք, որ կառավարության բոլոր այն անդամները, որոնք պաշտոնափոխ չեն լինելու, որպես կանոն, հերթով այցելում են Գյումրի ու խոսում հենց այս քաղաքում իրականացվող ապագա ծրագրերից: Երկու շաբաթ առաջ վարչապետ Տիգրան Սարգսյանը այցելեց Գյումրի ու ճյուղային արդյունաբերության զարգացման խոստումներ տվեց, այսօր էլ` փոխվարչապետը:
Արմեն Գևորգյանը, անդրադառնալով մայիսի 24-ին կառավարության ընդունած որոշմանը, համաձայն որի մարզերում սոցիալական բնույթի 3-րդ հրատապ ծրագիրն են իրականացնելու, տեղեկացրեց, որ Շիրակի մարզում ծավալները մնացել են անփոփոխ, այսինքն՝ դարձյալ 1 մլրդ. 320 մլն. դրամի գումար է հատկացվելու: Արմեն Գևորգյանն ասաց, որ այդ գումարից մոտ 500 միլիոնը ծախսվելու է Գյումրիում` ասֆալտապատման, բազմաբնակարանային շենքերի տանիքների, կրթական հաստատությունների ընթացիկ վերանորոգման վրա: «Եթե այս տեմպերով Գյումրիում 2-3 տարի գումարներ ծախսենք, ես կարծում եմ, Գյումրիի քաղաքացիների, բնակիչների կյանքը, հարմարավետության առումով բնակվելու, էականորեն կփոխվի , ինչը ես կարծում եմ անշեղորեն իրականացվելու է», -ասաց փոխվարչապետի պաշտոնակատարը:
Կարդացեք նաև
Ի դեպ, Արմեն Գևորգյանը չհամաձայնեց կառավարության 4 տարվա գործունեությունը անբավարար գնահատածների հետ : Ըստ նրա, ժողովրդավարական պետությունում ենք ապրում ու կառավարության հասցեին կարող են տարբեր գնահատականներ հնչել, սակայն այս չորս տարվա մեջ կառավարությունը անշեղորեն իրականացրել է պետական բյուջեով նախատեսված ու հաստատված բոլոր ծրագրերը:
Արմեն Գևորգյանի ասելով, այս տարի էլ նախատեսված է աշխատավարձերի ու թոշակների բարձրացում: «Ուրիշ բան, որ այդ նախատեսված հնարավորությունները չեն բավարարում մեր այսօրվա կյանքի ավելի լավ պատկերացումներին՝ ցավոք սրտի», -արդարացավ փոխվարչապետի պաշտոնակատարը:
Նունե ԱՐԵՎՇԱՏՅԱՆ
