Այսօր Կենտրոն եւ Նորք Մարաշ համայնքների առաջին ատյանի դատարանում ՀԱԿ ակտիվիստների դատավարության ժամանակ ակտիվիստներից մեկը՝ Սարգիս Գեւորգյանը ցուցմունք տվեց ու պատմեց, որ ոստիկանական բաժանմունքում մեկ անգամ հայհոյել է օպերլիազոր Կարենին, որն ասել էր՝ Արտակին լավ եմ արել, ծեծել եմ ու լկտի հայհոյանքներ է ասել իրեն: Մեղադրող կողմը կառչել էր նրանից, որ Սարգիսը Կարենին «մայր է հայհոյել»: Նա անընդհատ տարբեր ձեւերով փորձում էր հարցնել՝ ոստիկանին մայր հայհոյելը արդարացվա՞ծ է, մայր հայհոյելը, մորը հայհոյելը կարելի՞ է: Սարգիսը հարցին հարցով պատասխանեց. «Ոստիկանի՞ն: Ես ոստիկանի երբեք չեմ հայհոյել, հայհոյել եմ մի մարդու, որը ներխուժել էր ոստիկանություն, ծեծի էր ենթարկում մեզ ու լկտիաբար հայհոյում, նա չի ներկայացել որպես ոստիկան, որքան գիտեմ, ոստիկանը ներկայանում է: Իսկ հայհոյանքը ես եմ ընտրել»:
Մեղադրող կողմը նաեւ հետաքրքրվեց՝ դեպքի վայրում հասարակական կարգը խախտվե՞լ է: Սարգիսը նշեց, որ խախտվել է ոստիկանության կողմից: Նրանց հայհոյանքները հասարակությանը մեծ վնաս ու տրավմայի են ենթարկել»:
Հռիփսիմե ՋԵԲԵՋՅԱՆ
