«Ի՞նչը դրդեց, որ դուք պոկեք ոստիկանի ուսադիրները»,- Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանում, ՀԱԿ ակտիվիստների դատավարության ժամանակ, այս հարցը ակտիվիստ Արտակ Կարապետյանին տվեց մեղադրող կողմը: Հարցը լսելուն պես դահլիճում ծիծաղեցին, ինչը բարկացրեց դատավոր Գագիկ Պողոսյանին, որը հորդորեց՝ եթե դահլիճում հավաքվածներիդ թվում է, թե կինոթատրոն եք եկել, ծիծաղում եք, ես կարող եմ բոլորիդ դուրս անել: Ըստ ակտիվիստների, մեղադրող կողմը անիմաստ հարց է տալիս, քանի որ Արտակը կոնկրետ ուսադիրի հետ բացարձակ կապ չունի:
Դատավորն ավելի ուշ դահլիճից դուրս հրավիրեց մի կնոջ՝ ասելով, որ խանգարում է դատական նիստը: Կինը շնորհակալություն հայտնեց. «Այս մառազմը չեմ լսի, ավելի լավ» ու դուրս եկավ:
Դավիթ Քիրամիջյանին դատավորը նույնպես նկատողություն արեց՝ գրիչ ուզելու համար, երբ Դավիթն ուզում էր իր համար նշումներ կատարել: Դավիթը չհամաձայնեց նկատողության հետ, ինչին ի պատասխան՝ դատավորը զգուշացրեց. «Եթե քեզ թվում է այնքան քաջ ես, որ դատավորին հակաճառում ես, հիմա քո «քաջությունների» մասին էլ կլսենք»: Նա նկատողություն տվեց ու զգուշացրեց, որ կրկնվելու դեպքում անորոշ ժամանակով դուրս կանի դահլիճից:
Սարգիս Գեւորգյանն իր ցուցմունքում ներկայացրեց մի իրավիճակ, որ ներկաները հասկանան՝ իրենք ոստիկանությունում չեն եղել, այլ մի կառույցում, որտեղ ներկաները իրեն պահել են՝ որպես շարքային քրեական տարրեր:Սարգիսը վստահեցրեց, որ ինքն ու իր ընկերները չեն հայհոյել, չեն հարվածել ոստիկաններին: Հարցին՝ տեսե՞լ եք, որ Արտակ Կարապետյանը քաշքշուկի ժամանակ որեւէ ոստիկանի ուսադիր պոկի՝ Սարգիսը պատասխանեց, որ դժվար է անգամ պատկերացնել նման բան:
Կարդացեք նաև
ՀԱԿ ակտիվիստների դատավարությունը դեռ շարունակվում է:
Հռիփսիմե ՋԵԲԵՋՅԱՆ
