Այսօր շրջակա միջավայրի պահպանության օրն է: Ուստի բնապահպան «Էկոլուր» հ/կ-ի ղեկավար Ինգա Զարաֆյանը լրագրողների հետ հանդիպմանը բարձրաձայնեց մի շարք բնապահպանական խնդիրներ: Բնապահպանի հիմնական մտահոգությունը հանքարդյունաբերության բուռն զարգացումն է՝ բացասական հետևանքներով: Ի. Զարաֆյանին հատկապես մտահոգում է վերջին ամիսներին կառավարության կողմից ընդունված հողերի կատեգորիայի փոփոխությունները, որով գյուղատնտեսական նշանակության հողերի կատեգորիան իջեցվում է ընդերքօգտագործման` ՀԷԿ-եր կառուցելու համար:Նրա խոսքով, Հայաստանն արդեն իսկ քիչ հողային ռեսուրսներ ունի, գյուղնշանակության հողերը դժվարությամբ են օգտագործվում և, այս պարագայում, գյուղնշանակության հողերը կրճատվում են և այն հողերը չեն մշակվում, քանի որ մշակման համար պարզապես հնարավորություններ չկան: Ըստ բնապահպանի՝ իրավիճակն այնքան է սրվել հանրապետությունում, որ արդեն վտանգվում են նաև հատուկ պաշտպանության տարածքները: Տիկին Զարաֆյանը շեշտեց, որ բնապահպանական խնդիրներն իրենց անմիջական ազդեցությունն են ունենում նաև մարդու առողջության վրա: Այս առումով բնապահպանը մի քանի օրինակներ բերեց. «Կապանում երեխաների մազերի մեջ հայտնաբերվել է սնդիկ և մկնդեղ: Փաստորեն իրավիճակը հասել է նրան, որ փաստացի այս դեպքում էլ պետությունը միանգամից քայլեր չձեռնարկեց: Կամ Գեղանուշ գյուղում երեխաների ատամներն են սևանում: Մեկ այլ դեպք էլ պատմեմ: Մի քանի տարի առաջ Սյունիքի համայնքում էինք, որտեղ մեծ քանակով թափոնների արտանետում էր գրանցվել, այստեղ մեզ երեխաներից մեկը պատմեց, որ երեխաները մտում են թափոնների մեջ, ինչի արդյունքում նրանց մշակը սկսել էր պլոկվել: Երբ այդ երեխայի պապիկին հարցրինք՝ ինչու չեն դիմել համապատասխան մարմինների, նա պատասխանեց, թե, միևնույն է, հարցին լուծում չեն տալու, ուստի անիմաստ է»: Ի. Զարաֆյանը կարծում է, որ պետք է անհապաղ ստիպել նոր ձևավորվելիք կառավարությանը խնդիրների հրատապ լուծման համար, հակառակ դեպքում հետո արդեն ուշ կլինի: ՀՀ-ում տիրող իրավիճակը համեմատելով հետխորհրդային մյուս երկրների հետ՝ բնապահպանը նկատեց, որ իրավիճակը գրեթե նույնն է, մոտավորապես նմանատիպ իրավիճակ է գրանցվում նաև Վրաստանում, որը շատ հարցերում այլ քաղաքականություն է վարում և ցանկանում է փոխել իր համակարգը:
Տաթև ՀԱՐՈՒԹՅՈՒՆՅԱՆ
