2012թ. ԱԺ ընտրությունները ցույց տվեցին, որ հայ ժողովրդի ստվար զանգվածը դեռ պատրաստ չէ արդար ու ժողովրդավարական ընտրությունների և ունակ է վաճառելու իր անկախությունը, հիմնական իրավունքներն ու արժանապատվությունը: Պետությանն ու ազգաբնակչությանը կեղեքող օլիգարխները, նախորդ հինգ տարիների կողոպուտի համը բերանում, կարողացան Աստծու և պետության աչքի առաջ ևս հինգ տարով ժողովրդից գնել նրան իսկ կեղեքելու իրավունքը: Դա դեռ բավական չէ, հնչեցնում էին պոպուլիզմի ախտով վարակված կարգախոսներ, թե` սիրելի հայրենակիցնե´ր, «Ըմբռնումով մոտեցեք» «Հավատանք, որ փոխենք» «Մեր խոսքը գործ է», «Միասին օրենքի Հայաստան կառուցենք (ձավարով, մուրաբայով, հեռախոսներով…)»: Իսկական դահճի և զոհի համերաշխություն…
Ազգային զարթոնք ապրած, Խորհրդային հզոր իշխանության դեմ առաջիններից մեկը պայքարի ելած, արցախյան գոյամարտում հաղթած հերոս ժողովուրդը այսօր անճանաչելիորեն այլափոխվել և գլուխ է խոնարհում իրեն թալանող «վայ» հայրենակիցների առջև: Ստացվում է, որ արտաքին հարստահարիչների դեմ պայքարի հսկայական փորձ ունեցող հայ ժողովուրդը պատրաստ չէ՞ սեփական հարստահարողների դեմ պայքարին ու ակամա դառնում է ստրկատիրությանը սատարող ուժ: Այսօր ստրուկը միայն նա չէ, ում պարտադրել են այդ լուծը, այլև նա, ով կամովին է այն կրում կամ էլ, չկարողանալով փոխել միջավայրը, ինքն է փորձում ձեռք բերել իր ստրուկին: Ցավոք, մեր ակտիվ հայրենակիցների մի մասը դեռ այդպիսին է. գտնվելով ծանր կացության մեջ, նա մերժեց ծրագիրն ու գաղափարախոսությունը, ու խոնարհվեց «ոսկե հորթի», նյութական և ֆինանսական չնչին արժեքների, անօրինականության, վախի ու վարչական ռեսուրսների առջև: Այո´, այսօր ողջ հայ ժողովուրդը պատրաստ չէ վճռական, արդար պայքարի, ու նրան պետք է կրթել այդ գործի համար` ասպարեզ տրամադրելով ունակ ուժերին:
Իհարկե ցավալի է, որ Հայաստանի քաղաքացիների շուրջ 50%-ը չմասնակցեց ԱԺ ընտրություններին, մասնակցողների մի մասը մեկ օրվա հացի գնով վաճառեց արժանապատիվ կյանքի հեռանկարը և հնարավորություն տվեց, որ շարունակվի իր և դեռ աշխարհ չեկած երեխաների ապագայի թալանը: Ընտրողների մի մասը միայն քվեարկեց այլընտրանքային ԱԺ ունենալու համար, բայց միասնական չլինելով` պարտվեց:
«Միավորված հայեր» կուսակցության անունից շնորհակալություն ենք հայտնում բոլոր նրանց, ովքեր հավատացին մեզ և քվեարկեցին «Միավորված հայեր» կուսակցության համար, ովքեր արհամարհելով վախի մթնոլորտը, սպառնալիքները, նյութական և փողի արժեքները, չգայթակղվեցին ու ցանկացան Հայաստանը դարձնել ճշմարիտ սոցիալ-իրավական, ժողովրդավարական պետություն, որտեղ իշխանությունը կպատկաներ ժողովրդին, իսկ իշխանության երեք թևերի տիրակալը կլիներ ազգին ծառայող Օրենքի գերիշխանությունը: Հարկ ենք համարում ավելացնել, որ երկար ճանապարհը սկսվում է առաջին քայլից:
Կարդացեք նաև
Այո, դժվարին առաջին քայլն արված է …
Անկախ ամեն ինչից, մենք գնահատում ենք, որ մեր ազգը ունի նաև սթափ մտածող զավակներ: Նշանակում է դեռ ամեն ինչ կորած չէ: Նրանց վրա հենվելով` մենք, փոխելով մեր ռազմավարությունը, կշարունակենք պայքարը հանուն մեր ժողովրդի ու Հայրենիքի ապագայի: Աշխատանք կտանենք յուրաքանչյուրի հետ, կհամալրենք մեր շարքերը հիրավի ազգանպաստ, պետականամետ մտածողություն ցուցաբերող անձանցով:
Պայքարը քաղաքական դաշտում չի ավարտվել: Այն թեժ է լինելու, նոր երանգ է ստանալու, որդեգրելու է նոր մարտավարություն:
Հայաստանի Հանրապետությունը այլընտրանք չունի` հայ ժողովրդի ապագան երրորդ ուժն է. պետականամետ և կենտրոնաձիգ:
Ի լուր ՀՀ բոլոր քաղաքացիների «Միավորված հայեր» կուսակացությունը հայտարարում է, որ, անկախ քաղաքական դաշտում գրաված իր դիրքից, միշտ հավատարիմ կմնա իր նպատակին, գաղափարախոսությանը և սկզբունքներին: Նա կշարունակի իր պայքարը` որպես պետականամետ երրորդ ուժ, մինչև որ ՀՀ օրենսդիր մարմինը, որն այսօր ոչ ազգային է, ոչ էլ ժողով, կարողանանք դարձնել իսկական Ազգային Ժողով:
«Միավորված հայեր» կուսակցության պաշտոնական շաբաթաթերթը շարունակելու է մնալ ազատ, անկախ և անկողմնակալ լրատվամիջոց, որը քննադատելու է և´ իշխանամետներին, և´ ոչ կառուցողական ընդդիմությանը:
«Միավորված հայեր» կուսակցությունը կոչ է անում. միավորվենք, մի բռունցք կազմենք, վճռականորեն ո´չ ասենք հարուստների իշխանությանը:
Ազգովի պատրաստվենք գալիք տեղական ինքնակառավարման մարմինների ազատ, արդար և ժողովրդավարական ընտրություններին:
ՄՀԿ քաղաքական խորհուրդ
