ՀՀ սահմանադրական դատարանը սկսեց թիվ 37 ընտրատարածքում ՀՀ ԱԺ մեծամասնական ընտրակարգով պատգամավորի թեկնածու Սամվել Հարությունյանի դիմումի քննարկումը 2012թ. մայիսի 11-ին ԱԺ մեծամասնական ընտրակարգով պատգամավոր ընտրվելու մասին 31-Ա որոշումն անվավեր ճանաչելու պահանջով: Զեկուցող է ճանաչվել ՍԴ անդամ Վալերի Պողոսյանը, իսկ պատասխանողն էր ընտրատարածքային հանձնաժողովի նախագահը: Դատարան էր ներկայացել թեկնածուն՝ Սամվել Հարությունյանը:
Մինչ Սահմանադրական դատարանը կանցներ խորհրդակցական սենյակ` զեկուցողը տեղեկացրեց, որ Սամվել Հարությունյանից ստացել է երկու միջնորդություն, մասնավորապես՝ իր դիմումում առկա փաստերի ապացույցների ձեռքբերման համար հանձնախումբ ստեղծելու մասին:
Զեկուցողը հղում անելով ՍԴ օրենքին, հայտնեց, որ հանձնախումբ կարող է ստեղծվել միայն Սահմանադրության իրավազոր հարցերի վերաբերյալ, հետեւաբար այդ միջնորդությունը մերժվեց:
Հաջորդ միջնորդությունը կապված էր «քողարկված ընտրատարածքում» վերահաշվարկ կատարելու հետ: Զեկուցողը հայտնեց, թե «ենթադրյալ խախտումների վերաբերյալ» կարող էր դիմողը ձեռք բերված ապացույցների հիման վրա ներկայացնել փաստաթղթեր: Վերահաշվարկի պահանջը եւս մերժվեց: Սահմանադրական դատարանն անցավ խորհրդակցական սենյակ:
Կարդացեք նաև
ՀՀ ԱԺ մեծամասնական ընտրակարգով պատգամավորի թեկնածու Սամվել Հարությունյանը մեզ տեղեկացրեց, որ իր դիմումում ինքը վիճարկում է ՀՀ ոստիկանության անձնագրային եւ վիզաների վարչության մարտի 28-ին Դանիայի Թագավորությունում մշտապես բնակվող եւ աշխատող Թաթուլ Հակոբյանին վերջին 5 տարում ՀՀ-ում մշտապես բնակվելու մասին նույն վարչության Երեւան քաղաքի նոր Նորքի բաժանմունքի կողմից տրված տեղեկանքն անվավեր ճանաչելու մասին դիմումները:
Ի դեպ, ՀՀ վարչական դատարանը ապրիլի 2-ին ըստ Սամվել Հարությունյանի, ապօրինաբար մերժել էր Թաթուլ Հակոբյանին վերջին 5 տարում Հայաստանում մշտապես բնակվելու մասին ՀՀ ոստիկանության անձնագրային եւ վիզաների վարչության Երեւան քաղաքի Նոր Նորքի բաժանմունքի կողմից տրված տեղեկանքն անվավեր ճանաչելու պահանջի մասին հայցի ընդունումը:
Սամվել Հարությունյանը նաեւ տեղեկացրեց, որ ապրիլի 1-ին թիվ 37 ԸԸՀ-ն մերժել էր վերջին մեկ տարում Դանիայի Թագավորությունում մշտապես բնակվող եւ աշխատող Թաթուլ Հակոբյանին ՀՀ պատգամավորի թեկնածու չգրանցելու մասին դիմումը:
Ի դեպ, իր դիմումում Ս. Հարությունյանը ՍԴ-ին ներկայացրել էր հետեւյալ հաշվարկը՝ ՀՀ ԱԺ 2007թ. ընտրություններին մասնակցել են Գորիս քաղաքի մոտ 8000 ընտրողներ, ինչն այդ տարվա համար ուռճացված է ռեկորդային: Վերջին 5 տարիներին Գորիս քաղաքում փաստացի բնակվող ընտրողների թիվը պակասել է առնվազն 1000-ով: Ըստ նույն վիճակագրության, 2012թ. մայիսի 6-ի ընտրություններին մասնակցած ընտրողների թիվը նվազելու փոխարեն էականորեն «աճել» եւ կազմել էր 9775: Սամվել Հարությունյանի տեղեկացմամբ, ՀՀ-ից երկար ժամանակ, նաեւ ընտրությնա օրը բացակայող նախկին ավելի քան 3000 բնակիչների փոխարեն ՀՀԿ-ի եւ նրա թեկնածու Հայկ Գրիգորյանի օգտին կատարվել է քվեարկություն նաեւ Սիսիանում եւ այլ բնակավայրերում:
Ս. Հարությունյանի դիմումը կազմում է 6 էլեկտրոնային էջ, իսկ միջնորդությունները՝ 8 էջ:
Ռուզան ՄԻՆԱՍՅԱՆ
