Իջեւան քաղաքին գրեթե կպած Գետահովիտ գյուղի հին գերեզմանատան թաղամասը գտնվում է սողանքային վտանգավոր գոտում: Գետահովտի գյուղապետարանից հայտնեցին, որ սողանքի գոտում է գտնվում 95 տուն, որից 50-ը՝ հին գերեզմանատան թաղում:
Գետահովտի 2 տուն ունի վթարայնության 5-րդ , 22-ը՝ 4-րդ կարգ: Սողանքն օրեցօր ակտիվանում է, մարդիկ քնում են ահը սրտում, երկյուղելով, որ ամեն գիշեր կարող է փլուզում լինի, եւ իրենք կմնան փլատակների տակ:
Հին գերեզմանատան թաղամասի սկզբնամասում ճանապարհը մոտ կես մետր փոս է ընկել: Ընդերքում կատարվող տեղաշարժի պատճառով ջրատար խողովակները հայտնվել են գետնի երեսին, տեղ-տեղ գետինը պատռվել է, խոր փոսեր են առաջացել: Գետահովտում սողանքային երեւույթներն ի հայտ են եկել 1988թ. երկրաշարժից հետո, ստորեգետնա ջրերի hոսքի պատճառով հողի սահքն ակտիվացել է:
Կարդացեք նաև
Առավել վատթար վիճակում է միայնակ ապրող կենսաթոշակառու Հերիքնազ Առաքելյանի տունը, վերջին երկու ամիսներին նրա տունն ու բակը սկսել են փլվել: Տարեց կնոջ տան պատշգամբը, կառույցի սյուներն ու աստիճաններն իջել են: Տան հիմք-գետինը «նստում» է, հենապատերն անկարող են եղել դիմանալ բնության տարերքին: Տարեց կինը ստիպված փլված պատշգամբի վրայով փայտե կամրջակ է անցկացրել, որով շրջանցում է փլատակները: Նա չի ուզում լքել իր տունը , զավակների մոտ արտերկիր տեղափոխվել:
Իսկ նույն թաղամասի բնակիչ Վալերի Ղազարյանը ստիպված լքել է իր նորակառույց երկհարկանի տունն ու բազմանդամ ընտանիքը տեղափոխել մեկ այլ տուն, վարձով բնակարան:
Հայտնենք, որ դեռեւս 90-ականներին Գետահովտի վեց ընտանիք սողանքի համար փոխհատուցում է ստացել եւ տեղափոխվել այլ տեղ ապրելու: Գետահովտի գյուղապետ Սարգիս Ղազարյանը այս թաղամասի խնդրի, աստիճանաբար ուժեղացող սողանքի եւ մարդկանց սպառնացող իրական վտանգի մասին բազմիցս հայտնել է Տավուշի մարզպետարան եւ կառավարություն: Գյուղապետն ասում է, որ սողանքի հետեւանքով ջարդվում են ջրատար խողովակները, եւ իրենք ստիպված են լինում դրանք փոխել: Կառավարության օգնությունն առայժմ չկա:
– Ոչ մեկից օգնության հույս չունենք, հույսներս միայն Աստված է,- ասաց համայնքի ավագանու անդամ Գագիկ Հարությունյանը:
Ոսկան ՍԱՐԳՍՅԱՆ
