Հավաքական հրավիրվող ֆուտբոլիստները ուսումնամարզական հավաքներին ներկայանում են տարբեր մարզավիճակով: Ոմանք հոգնած են լինում լարված մրցաշրջանից հետո, մյուսների մոտ խաղային պրակտիկայի պակաս է նկատվում, մյուսներին էլ զգալ են տալիս մանր-մունր վնասվածքները: Սակայն Վարդան Մինասյանն արդեն կողմնորոշվել է Ղազախստանի հետ ընկերական հանդիպման կազմն ընտրելու հարցում` բացառությամբ պաշտպանական գծի մեկ օղակի:
Մեր հավաքականի գլխավոր մարզիչը լրագրողներին տեղեկացրեց, որ Ռոման Բերեզովսկու մոտ ամեն բան նորմալ է, որ նրան անգամ ոչ թե վիրահատել, այլ վիրահատական թեթեւ միջամտություն են կատարել եւ որ նա մի քանի օրից շարք կվերադառնա: Ղազախստանի հետ խաղում դարպասին կկանգնի Գեւորգ Կասպարովը, իսկ որպես փոխարինող «Գանձասարից» հրավիրվել է Գեւորգ Պրազյանը: Արազ Օզբիլիսն էլ վնասվածքից ապաքինվել է եւ մարզումները վերսկսել: Սակայն Վարդան Մինասյանի համոզմամբ, նրա` խաղադաշտ վերադառնալու ժամանակն արագացնել չարժի:
Աշոտ ՀԱԿՈԲՅԱՆ
