Հունիսի 2-ից ուժի մեջ մտած «Վարչական իրավախախտումների վերաբերյալ ՀՀ օրենսգրքում փոփոխություններ եւ լրացումներ կատարելու մասին» օրենքը դժգոհության ալիք է բարձրացրել վանաձորցի անհատ տաքսիստների շրջանում:
Ճանապարհային երթեւեկության կանոնների խախտման տուգանքների փոփոխությունները վարորդները աբսուրդ են համարում:
Այս մտահոգություններով էլ այսօր առավոտյան 100-ից ավելի վարորդ Վանաձորի կենտրոնական հրապարակում իր բողոքն էր արտահայտում:
«Աբսուրդ թվեր են, որը մենք ի վիճակի չենք վճարելու, եթե ի վիճակի լինեինք, տաքսի չէինք քշի»,-ասում է վարորդներից մեկը:
Կարդացեք նաև
Նրանք, սակայն, պնդում են, որ իրենք ոչ թե հրաժարվում են օրենքը կատարելուց, այլ ընդամենը տուգանքների գների բարձրացմանը ի վիճակի չեն դիմակայելու:
«Մենք ոչ թե հրաժարվում ենք, այլ ի վիճակի չենք նման թվեր վճարել»,-ասում է տաքսու վարորդներից մեկը` ցույց տալով երկու ժամ սպասելուց հետո աշխատած միակ 500 դրամանոցը:
«Երկու ժամ ապասել եմ, որ սա աշխատեմ, հիմա սրանով ընտանիք պահեմ, ավտոյի հարցե՞րը լուծեմ, թե՞ պետության»,- տարակուսանքով հարցնում է նա:
Օրենքի փոփոխությամբ, օրինակ, ուժի մեջ գտնվող տեխնիկական զննության կտրոնը տրանսպորտային միջոցի` օրենսդրությամբ սահմանված տեղում չփակցված վիճակով տրանսպորտային միջոց վարելու համար այժմ վարորդը կտուգանվի 20.000 դրամով, նախկինում նման տուգանք չկար: Տրանսպորտային միջոցներ վարելու իրավունքից զրկված անձանց կողմից տրանսպորտային միջոցներ վարելու համար էլ վարորդը կտուգանվի 200. 000 դրամով:
Եթե օրենքում փոփոխություններ չմտցվեն, ապա վանաձորցի վարորդներից շատերը այլ ելք չեն ունենա, քան երկրից հեռանալն է:
«Կգնանք բախտ որոնելու, հո էստեղ սոված չենք ապրելու»,-ասում են նրանք:
Անուշ ԲՈՒԼՂԱԴԱՐՅԱՆ
