ԱՄՆ քաղաքացի, նկարիչ Հրայր Ագանիկյանը դատապարտվել է 9 տարվա ազատազրկման եւ ներկայումս պահվում է արդարադատության նախարարության «Նուբարաշեն» քրեակատարողական հիմնարկում:
Այս գործով, ինչպես նախաքննությանը, այնպես էլ ընդհանուր իրավասության դատարանում ընթացած դատաքննությանն անդրադարձել ենք: Նշենք միայն, որ նախաքննությունը տեւեց 1 տարի 4 ամիս, իսկ դատաքննությունը՝ 5,5 տարի:
Առաջին ատյանի ընդհանուր իրավասության դատարանում ընթացած դատական նիստերին էլ հետեւում էին ԱՄՆ դեսպանատան ներկայացուցիչները:
Հ.Ագանիկյանը դատավճիռը բողոքարկել է ՀՀ քրեական գործերով վերաքննիչ դատարանում, այն մնացել է անփոփոխ, իսկ վճռաբեկ դատարանն էլ բողոքը վերադարձրել է: Դատապարտյալը, որը մեղադրվել է վաշխառության եւ առանձնապես խոշոր չափի գումարի հափշտակությամբ խարդախության համար, դիմել է Մարդու իրավունքների եվրոպական դատարան;
Կարդացեք նաև
«1997թ. նախ ես, հետո եղբայրներս իրենց ընտանիքներով, թոռներով ԱՄՆ-ից վերադարձանք հայրենիք:Մենք էն տեսակն ենք, որ գաղթականի բարդույթից չի ազատվում եւ ամեն գնով ձգտում է իր ակունքներին, հող ու ջրին: Լինելով նկարիչ, ողջամիտ համարեցի որեւէ բնագավառում մասնագիտացված ու բարեխիղճ գործարարի հետ համագործակցելու, ինչպես ասում են՝ «հացը տուր հացթուխը թխի, մի հատ էլ՝ ավել տուր» սկզբունքով:
Սակայն 7 տարի տեւած իմ փորձանքա-որոնողական աշխատանքներից, շփումներից հուսախաբ, որոշեցի ինքնուրույն հող վարձակալել եւ մրգատու այգի բացել:
Արդյունքը եղավ այն, որ դատախազը պահանջեց 13 տարվա ազատազրկում, իսկ դատապարտվեցի 9 տարով, գույքի կեսի /համազոր ամբողջի/ բռնագրավմամբ, իսկ Կոտայքի մարզում վարձակալած 12 հեկտար հողս էլ մնաց խոպան»,- ասում է ամերիկահայ մտավորականը:
Նա ներկայացնում է հայ գործարարների գործունեությունը: Ըստ Հ.Ագանիկյանի, իրեն հանդիպած «հաջողակ» գործարարներն իրականում ունեին մեծ պարտքեր, տոկոսների տակ էին, եւ որ սփյուռքից եկած «միամիտ հայրենասերներ» էին ճարում, որպեսզի նրանց «քցեին»:
Հ.Ագանիկյանը տեղեկացնում է, որ 2000թ.առուծախի պայմանագրով անշարժ գույք է ձեռք բերել Ղարիբյան ազգանունով մի քաղաքացուց՝ նրա եղբոր 9000 դոլար պարտքի դիմաց: Ագանիկյանը դատական նիստի ժամանակ, դատարանին էր ներկայացրել 2001թ. կողմերի միջեւ քաղգործով կայացրած վճիռը, համաձայն որի, կալանավորվածից «տուժողները» ընդունել էին, որ իրենք պարտք են եղել նրան 9000 դոլար գումար:
Հ.Ագանիկյանը Հայաստանում ադամանդի մշակման նպատակով սահմանափակ պատասխանատվության ընկերություն հիմնեց, այդ նպատակով ձեռք էր բերել հաստոցներ, ստացել լիցենզիաներ: Այդ նախաձեռնությունն էլ մնաց անկատար, նրան խաբեցին, սակայն հայտնվեցին տուժողներ եւ պահանջ ներկայացրեցին Ագանիկյանի դեմ:
«Ես անհարմար եմ զգացել իմ անձնական, բիզնեսային ոդիսականը հրապարակայնացնելուց:Չկա քաղաքական ինտրիգ: Ո՞ւմ է հետաքրքիր»- ասում է Հ.Ագանիկյանը:
Հ.Ագանիկյանը տեղեկացնում է, որ 1990թ-ից Լոս-Անջելեսում հավաքված գումարներով զորակցել է Արցախի ինքնապաշտպանությանը, եղել է «Զորավիգ Էրգրին» միության ատենապետը, որին անդամակցել են տեղական 4 պարբերականներ. «Ես իմ պատքն եմ համարում զգուշացնելու իմ այն հայրենակիցներին, որոնք պատրաստվում են գալ Հայաստան, իրենց «մոմը» վառելու:Ձեզ ինչ օգուտ, որ մեր նմանները գան ու ներքաշվեն խտրականության այս բոզզաշում: Թող որ մարդիկ իմանան, որ քայլում են կրիմինալի ու նախախնամության ականապատված դաշտում»:
Ռուզան ՄԻՆԱՍՅԱՆ
