«Իհարկե պատգամավորական մանդատը մի փոքր հնարավորություններն է մեծացնում պայքարելու, բայց ցանկացած պարագայում մենք մեր տեղը վաստակել ենք, մեր խոսքը ասելու իրավունքը վաստակել ենք: Մենք մեր աշխատանքով իրավունք ենք ձեռք բերել, որ կարող ենք ժողովրդի պատգամաբերը լինել, ուստի մեր գործունեությունը նորից նույն ձեւով շարունակելու ենք»,- Aravot.am-ի հետ զրույցում ասաց «Ժառանգության» նախկին պատգամավոր Արմեն Մարտիրոսյանը: Մեր հարցին՝ ժամանակի ընթացքում հնարավո՞ր է այս հիասթափությունները խորանան եւ «Ժառանգությունից» դուրս գալու հիմք հանդիսանան՝ Արմեն Մարտիրոսյանը պատասխանեց. «Չեմ կարծում: Եթե այդ հիասթափություններին նայեինք՝ պետք է որ այս օրերին դուրս եկած լինեինք: Բայց որեւէ մեկը դուրս չեկավ: Անկախ նրանից, թե մեր կուսակցականները ինչպիսի կարծիք ունեն ընտրությունների վերաբերյալ, մենք բոլորս միասին երկար ժամանակ է, ինչ համատեղ պայքարի մեջ ենք, եւ չեմ կարծում, որ այդ համատեղ պայքարը ընդհատվել է այս փուլում: Ընդհակառակը, կարծում եմ՝ դեռ մենք շարունակելու ենք պայքարել»:
«Ազատ դեմոկրատներ» կուսակցության մասին պարոն Մարտիրոսյանը դժվարացավ պատասխանել՝ կիսո՞ւմ է Լարիսա Ալավերդյանի կարծիքը, թե՞ ոչ. «Ամեն մեկս մեր կարծիքն ունենք, թե որն է ճիշտը՝ մոտակա ապագան ցույց կտա»:
ԱԺ անդրանիկ նիստին պարոն Մարտիրոսյանը հետեւել է եւ արտառոց որեւէ տպավորություն չի ստացել: Ինչ վերաբերում է բաց քվեարկություններին՝ ըստ նրա «մեր պետության մեջ ոչ ճիշտ ընտրությունները կամ ընտրական խախտումները նորություն չեն»: Արմեն Մարտիրոսյանը հույս ունի, որ 5-րդ գումարման ԱԺ-ում «Ազատ դեմոկրատների» ներկայացուցիչները «Ժառանգության» բարձր նշաձողը կպահեն:
Ինչ վերաբերում է նախագահական ընտրություններին, պարոն Մարտիրոսյանը հավակնորդ է տեսնում կուսակցության առաջնորդ Րաֆֆի Հովհաննիսյանին. «Թե ինչ որոշում նա կկայացնի, ցանկացած դեպքում դա անձնական որոշման խնդիր է, մենք կհարգենք պարոն Հովհաննիսյանի ցանկացած որոշում: Ես ինքս նրան տեսնում եմ նախագահական ընտրությունների հավանական թեկնածու»:
Կարդացեք նաև
Հռիփսիմե ՋԵԲԵՋՅԱՆ
