արխիվային լուսանկար
ՀԱԿ պատգամավոր Լյուդմիլա Սարգսյանի համար քաղաքական դաշտը դեռ հստակեցված չէ, բայց հստակ է մի բան՝ առ այսօր ՀԱԿ-ի բոլոր քայլերը արդարացված են: «Իշխանությունը մոնոլիտ չէ, կոալիցիա չի ձեւավորվել, դրա արդյունքում մեր պայքարի վեկտորն ուղղված է դեպի Սերժ Սարգսյանը»,- Aravot.am-ին ասաց տիկին Սարգսյանը՝ ՕԵԿ-ը որպես կոալիցիոն գործընկեր չդիտարկելով. «Լրջագույն ձեռքբերում է, երբ իշխանության 2 մեծագույն հատված չկարողացան միասնական կոալիցիայի մեջ մտնել, Բարգավաճը առ այսօր դեռ չի հայտարարել ՝ սատարելու է Սերժ Սարգսյանին»:
«Ուրեմն խաղի կանոնները կարող են փոխվել, եւ Բարգավաճը, չեմ բացառում, որ կարող է ինքնուրույն քայլեր դրսեւորել»,- հավատում է տիկին Սարգսյանը:
Նա նաեւ խոստովանեց, որ ԲՀԿ-ն ԱԺ ընտրություններում ՀԱԿ-ին խանգարել է.«Շատ տեղերում, որտեղ չի ունեցել մեծամասնական թեկնածու, ամեն դեպքում, փորձել է աջակցել ՀԱԿ-ին: Գիտեք ինչ, որ ներկայացել է այլընտրանք, բնականաբար, ժողովրդի մի հատված, մտածում էր՝ ինչ տարբերություն ՀԱԿ-ի՞ն ձայն տա, թե՞ ԲՀԿ-ին»:
Արփինե ՍԻՄՈՆՅԱՆ
