Այսօր «Ժառանգության» համագումարում իր մանդատի հարցը Րաֆֆի Հովհաննիսյանը թողեց վարչության որոշմանը: Լրագրողների հետ ճեպազրույցում նա նշեց, որ վարչության կազմը հիմա պիտի ընտրեն, նոր վարչությունը կգումարի իր առաջին նիստը, որտեղ որոշում կկայացնի ԱԺ-ում «Ժառանգության» մասնակցության բանաձեւը. «Այն կդիտարկի նաեւ իմ դիրքերը: Ինչպես նախընտական համամասնական ցուցակը որոշվեց կոլեգիալ հավաքական որոշմամբ, նույն կերպ այդ հարցը կլուծվի ոչ թե այս կամ այն թեկնածուի, պատգամավոի անհատական ցանկությամբ, այլ նույն կոլեգիալ նիստով:«Ժառանգություն» կուսակցության նորընտիր վարչությունը իմ մանդատի հարցը կքննարկի եւ եթե իմ առաջարկներին հաղորդակից կլինի, մենք վերկուսակցական նոր ուժի կերտման ուղղությամբ քայլեր կկատարենք: Ես կարող էի որպես անհատ որոշել, բայց ես ցանկացել եմ, որ դա որոշվի մեր վարչության կոլեգիալ որոշմամբ, ինչպես համամասնական ցուցակը»:
Հարցին՝ ինչո՞ւ ներկա չէիք ԱԺ անդրանիկ նիստին՝ նա պատասխանեց. «Հերթական անգամ, ցավոք, ունենք հերթական դե ֆակտո խորհրդարանը, այդ երկու բաղադրատարրերը կողք կողքի դնելով՝ դուք կարող եք հասկանալ, թե ինչու ներկա չէինք»: Նախագահական ընտրություններին իր թեկնածության հավանականության առնչությամբ Րաֆֆի Հովհաննիսյանը ասաց, որ ինքը նախընտրում է լրիվ ուրիշ մարդու թեկնածություն պաշտպանել: Թե ով է նա՝ չասաց՝ նշելով. «Իմ նախընտրությունը քիչ է: Հիմա ես հիմք կամ հնարավորություն չունեմ անհատական կարծիք հայտնելու: Ես հավատացած եմ՝ հավաքական թեկնածու պիտի լինի, կարող է ձեզնից մեկը լինի»:
Հարցերին, եթե դեմ էիք ընտրությունների արդյունքներին՝ փողոց ինչո՞ւ դուրս չեկաք, ինչո՞ւ չմիացաք ՀԱԿ-ին՝ ՍԴ դիմելու հարցում՝ պարոն Հովհաննիսյանը նշեց. «Մենք ողջունում ենք ՀԱԿ-ի քայլը, որը ինքը միակը եղավ դիմելու ՍԴ: Թեեւ այնտեղ էլ ապացուցողական շեմերի խնդիր կար, ավելի կազմակերպված, ավելի համալիր աշխատելու խնդիր կար, բոլոր դեպքերում ես ողջունում եմ այդ քայլը, գոնե այդ առումով ավելի կազմակերպված էին, քան մնացածը: Եթե «Ժառանգության» վարչությունը ընդունի իմ առաջարկները, ներկա կլինի բոլոր ճակատներում՝ փողոցում, ԱԺ-ում, պուրակներում, թե հրապարակներում»:
Կարդացեք նաև
«Ազատ դեմոկրատներ» կուսակցության առաջնորդ Խաչատուր Քոքոբելյանի, Ալեքսանդր Արզումանյանի բացակայությունը համագումարին պարոն Հովհաննիսյանը բացատրեց այսպես. «Իրենց վարչության անդամները ներկա են»:
Հռիփսիմե ՋԵԲԵՋՅԱՆ
