Տավուշի մարզի ֆիզկուլտուրայի ուսուցիչները Aravot.am-ի թղթակցին հայտնեցին, որ հանրակրթական դպրոցների 9-րդ եւ 12-րդ ավարտական դասարանցիների կողմից հանձնվող «ֆիզիկական կուլտուրա» առարկայի քննության նորմատիվային պահանջներն այս տարի փոխվել են, դրա հետեւանքով հիմնական եւ ավագ դպրոցների բազմաթիվ շրջանավարտներ մայիսի վերջին ի վիճակի չեն եղել հանձնել այդ քննությունը: Ուսուցիչներն իրենց անունները չհրապարակելու պայմանով հայտնեցին, որ իրենք ստիպված են եղել «խմբագրել» այդ քննությունների արդյունքները: Կապված 12-ամյա կրթության անցնելու հետ՝ 2011թ. դպրոցներում ավարտական քննություններ չեն կայացել: 2010թ. գոյություն ունեցած ֆիզկուլտուրայի քննական նորմատիվներով 8-րդ դասարանի շրջանավարտ աղջիկները «հենացատկ տեղից» վարժությունում «բավարար» ստանալու համար պետք է ցատկեին 135-150, տղաները՝ 155-170 սմ: Այս տարի սահմանված նորմատիվներով 9-րդ դասարանցի աղջիկները 4 միավոր(«բավարար») ստանալու համար պետք է ցատկեին 150-154, տղաները՝ 190-194 սմ: 2010թ. 8-րդ դասարանցի աղջիկները նույն վարժությունից «գերազանց» ստանալու համար պետք է ցատկեին 160 սմ եւ բարձր, տղաները՝ 180 սմ եւ բարձր: Այս տարի 9-րդ դասարանի շրջանավարտ աղջիկները այդ վարժությունից 9-10 միավոր («գերազանց») ստանալու համար պետք է ցատկեին 175-180սմ եւ բարձր, տղաները՝ 215-220սմ եւ բարձր: Նոր նորմատիվներով «մեծացել» է նաեւ դպրոցակաների վազքի արագությունը: 2010թ. միջնակարդ դպրոցի, 10-րդ դասարանն ավարտող աղջիկները «վազք 6 րոպե(մետր)» վարժությունից «բավարար» ստանալու համար այդ ժամանակահատվածում պետք է վազեին 900-1000մ, տղաները նույն ժամանակում՝ 1100-1200մ: Այս տարի 12-րդ դասարանն ավարտող տղաները «վազք 1000մ(րոպե)» վարժությունում 4 միավոր («բավարար») ստանալու համար 1000մ-ը պետք հաղթահարեին 4,06-4,10 վայրկյանում, աղջիկները նույն գնահատականին արժանանալու համար, 500մ-ը պետք է հաղթահարեին 2,16-2,20 վայրկյանում: Այս դեպքում եւս նորմատիվների տարբերությունն ակնհայտ է: Այս տարի 12-րդ դասարանն ավարտող տղաները նոր մտցված, «ձգումներ կախ դրությունից (անգամ)» վարժությունից 9-10 միավոր ստանալու համար, պետք է պտտաձողից ձգվեին 13-14 անգամ եւ ավելի: Մեր տեղեկություներով՝ ՀՀ ոստիկանական ակադեմիայում ընդունելության քննությունների ժամանակ այս վարժությունից «գերազանց» ստանալու համար հարկ է 12 անգամ ձգվել: Տավուշի մարզի ֆիզկուլտուրայի ուսուցիչներն ուշադրություն են հրավիրում այն հանգամանքի վրա, որ նորմատիվային այս խստացումների, քննության մեջ նոր վարժություններ մտցնելու մասին իրենք ժամանակին տեղյակ չեն եղել, որպեսզի դպրոցականներին համապատասխան ձեւով մարզեին: Նաեւ նշում են, որ նախկինում աշակերտը միջին դպրոցը՝ 8-րդ դասարանը, ավարտում էր 15 տարեկանում, իսկ հիմա 9-րդ դասարանը՝ 14 տարեկանում, եւ այս առումով եւս նորմատիվային խստացումներն անհասկանալի են : Կարծում ենք, որ Կրթության եւ գիտության նախարարությունը պետք է պարզաբանումներ տա, թե ինչի՞ հաշվին մեկ տարվա մեջ «աճեցին» հայ դպրոցականների ֆիզիկական հնարավորությունները:
Ոսկան ՍԱՐԳՍՅԱՆ
