Ռուսաստան - Ոստիկանները բողոքի ցույցի մասնակցի են ձերբակալում, Մոսկվա, 31-ը մայիսի, 2012թ.
Ռուսաստանի Պետական դումայի սահմանադրական օրենսդրության եւ պետական շինարարության հանձնաժողովը մայիսի 30-ին լրամշակել է իշխող «Եդինայա Ռոսիա»-ի կազմած եւ մամուլում «հակահանրահավաքային» անունը ստացած օրինագիծը, որը հունիսի 5-ին կներկայացվի երկրորդ ընթերցման։
Ռուսաստանցի իրավապաշտպանների փոխանցմամբ` հանձնաժողովն այդ օրինագիծն է՛լ ավելի խիստ է դարձրել եւ երկրում, փաստորեն, պարետային ժամի տարրեր են ներմուծվելու։
Պատգամավոր Իլյա Պոնոմարյովը «Կոմերսանտ»-ի թղթակցին ասել է, թե իշխանական ուժը ցանկանում է արդեն հունիսի 6-ին երրորդ ընթերցմամբ ընդունել օրինագիծը եւ այն փոխանցել Դաշնության խորհուրդ։ Վերին պալատում ընդունվելուց հետո օրինագիծը հունիսի 7-ին կվավերացվի նախագահ Վլադիմիր Պուտինի ստորագրությամբ, հաջորդ օրը` հունիսի 8-ին կհրապարակվի մամուլում եւ ուժի մեջ կմտնի։
Դա նշանակում է, որ Մոսկվայում հունիսի 12-ին «Միլիոնների երթ» անվամբ բողոքի ակցիայի կազմակերպիչներն ու մասնակիցները պետք է առավել զգոն եւ զգույշ լինեն։ Իշխանություններն արդեն նախազգուշացրել են, թե ոստիկանները կոշտ ձեւով կարձագանքեն չարտոնված հանրահավաքին։
Կարդացեք նաև
Նախնական տարբերակով` չարտոնված հանրահավաքի կազմակերպիչները պարտավոր կյլինեին վճարել մինչեւ մեկեւկես միլիոն ռուբլի, ինչը հավասար է մոտ 48 հազար ամերիկյան դոլարի։ Երկրորդ ընթերցման ներկայացվելիք տարբերակով գումարն իջեցվել է մինչեւ 500 հազար ռուբլի (15 հազար 400 դոլար)։
Հանրահավաքների մասնակիցը չի կարող դիմակով ծածկել երեսը։ Կտուգանվեն նաեւ մարդիկ, ովքեր որեւէ եղանալով, այդ թվում` ինտերնետով, ուրիշներին կոչ կանեն մասնակցել չարտոնված հանրահավաքի։
Իրավապաշտպանների կարծիքով` հնարավոր են նույնիսկ անհեթեթ իրավիճակներ. երբ, ասենք, մասնավոր հավաքում, հարսանիքի կամ որեւէ այլ տոնակատարության ընթացքում ինչ-որ մեկը հրապարակավ հնչեցնի հակակառավարական կարգախոսներ, ապա, տեսականորեն, կպատժվեն ոչ միայն այդ անձն, այլեւ հավաքի կազմակերպիչները։
Մոսկվացի վերլուծաբան Վլադիմիր Պրիբիլովսկու կարծիքով` իշխանությունները կփորձեն այդ ամենը կիրառել մոտ ապագայում։
«Իշխանությունները վախենում են զանգվածային հավաքներից եւ ցանկանում են զսպել դրանք», – ասել է Պրիբիլովսկին։
Հասարակական կարծիքի հետազոտման համառուսաստանյան կենտրոնի տվյալներով` ռուսաստանցիների 40 տոկոսը դեմ է բողոքի զանգվածային ակցիաներին։
Արմեն Քոլոյան
«Ազատություն» ռադիոկայան
