Սույն թվականի մայիսի 30-ին մի շարք համացանցային լրատվամիջոցներով տարածվեց տեղեկատվություն, ըստ որի, նախորդ օրը հիմնադրված «Թեղուտի հանքի պաշպաններ» հասարակական կազմակերպությունը հիմնադիր նիստից անմիջապես հետո հանդես է եկել հայտարարությամբ, որում դատապարտել է Թեհմինե Ենոքյանի «Բնության հաշվեհարդար» ֆիլմը՝ նշելով, որ ֆիլմում տեղ են գտել հերհյուրանքներ: Ըստ լրատվամիջոցներում հայտնված տեղեկատվության՝ այդ կազմակերպության ներկայացուցիչները կոչ են արել «Բնության հաշվեհարդար» ֆիլմի ստեղծողներին ներողություն խնդրել լոռեցի երիտասարդներից և խորհուրդ են տվել երևանցի երիտասարդներին չմիջամտել Լոռու հարցերին, այլ՝ զբաղվել սեփական քաղաքի խնդիրներով: Այս գործողությունն արժանացավ էական հակազդեցության և բացասական արձագանքների facebook սոցիալական ցանցում և որոշ լրատվամիջոցներում:
«Պաշտպանենք Թեղուտը» սոցիալ-տնտեսական բնապահպանական հասարակական կազմակերպությունը սույնով հայտարարում է, որ որևէ առնչություն չունի «Թեղուտի հանքի պաշպաններ» հասարակական կազմակերպության հետ և ԶԼՄ հրապարակումներում հայտնվածից բացի, այլ տեղեկություն չունի դրանում ներգրավված անձանց մասին:
Միևնույն ժամանակ, ձգտելով նպաստել շրջակա միջավայրի պահպանությամբ մտահոգ և տնտեսական զարգացման գաղափարների հանրայնացման նպատակ ունեցող քաղաքացիական ուժերի կառուցողական երկխոսությանը, «Պաշտպանենք Թեղուտը» սոցիալ-տնտեսական բնապահպանական հասարակական կազմակերպությունը քաղաքացիական հասարակության բոլոր անդամներին կոչ է անում, անկախ գործունեության նպատակներից, զերծ մնալ ծայրահեղական միջոցներից և լինել այլակարծության նկատմամբ առավել հանդուրժող:
«Պաշտպանենք Թեղուտը» սոցիալ-տնտեսական բնապահպանական հասարակական կազմակերպությունը, նպատակ ունենալով նպաստել Հայաստանում իրականացվող տնտեսական ծրագրերի համարժեք ընկալմանը լայն հասարակայնության կողմից, դատապարտում է Հայաստանի տնտեսական կյանքում կարևորագույն դերակատարում ունեցող ոլորտներից մեկը՝ լեռնահանքային արդյունաբերությունը, լայն հասարակայնության աչքում ամեն կերպ հեղինակազրկելու փորձերը: Միևնույն ժամանակ, մենք այն համոզմանն ենք, որ Հայաստանի ցանկացած վայրում սոցիալական և բնապահպանական խնդիրների վերաբերյալ իր տեսակետն արտահայտելու իրավունք ունի Հայաստանի յուրաքանչյուր քաղաքացի՝ անկախ բնակության վայրից:
Կարդացեք նաև
Կոչ ենք անում հասարակության տեղեկատվական շահեր ներկայացնելու հավակնող բոլոր անձանց ու կազմակերպություններին իրենց հրապարակումներում լինել հնարավորինս անկողմնակալ: Հատկապես այնպիսի իրադրություններում, երբ լուսաբանումը ենթադրում է սոցիալ-տնտեսական և բնապահպանական խնդրակարգերի համադրում, խնդիրները ներկայացնել համակողմանի՝ ներգրավելով բոլոր շահագրգիռ կողմերի ներկայացուցիչներին:
«Պաշտպանենք Թեղուտը» սոցիալ-տնտեսական, բնապահպանական
հասարակական կազմակերպության նախագահ Վահրամ Ավագյան
