Մայիսի 26-ին օծվեց և շուքով բացվեց Իջևանի Սուրբ Ամենափրկիչ եկեղեցին: Դրա շինարարությունը նախաձեռնել ու հովանավորել են իջևանցի, ներկայումս Ուկրաինայում գործարարությամբ զբաղվող Ղազարյան եղբայրները:
Մայիսի 20-ին Բերդ քաղաքում կատարվել էր Սուրբ Գեւորգ եկեղեցու հիմնարկեքը: Վերջին տարիներին արտերկրի եւ հայաստանաբնակ հարուստների կողմից Տավուշի մարզում կառուցվել եւ կառուցվում են բազմաթիվ եկեղեցիներ, մատուռներ: Սակայն պատմամշակությային մեծ արժեք ունեցող հնադարյան վանքերը, որոնք գտնվում են Մայր Աթոռի տնօրինության տակ, քանդվում են:
Արդեն տեղեկացրել ենք, որ քանդման եզրին են «Գոշավանք» վանական համալիրի մաս կազմող,1241թ. կառուցված Սուրբ Գրիգոր Լուսավորիչ եկեղեցին, 1237-1294 թվականներին կառուցված գրատուն-զանգակատունը, սեղանատունը: Համալիրի կենտրոնական՝ Սուրբ Մարիամ Աստվածածին եկեղեցու որոշ հատվածներ այցելուների համար փակ են, քանի որ առաստաղից քարեր են թափվում:
Կարդացեք նաև
Անմխիթար վիճակում է նաեւ Աչաջուր գյուղում գտնվող հռչակավոր Մակարավանքը: 13-րդ դարի եկեղեցին անձրեւներից պաշտպանելու համար տանիքը տեղ-տեղ տանիքը ծածկվել է ցելոֆանով: Դա արել է Մակարավանքի խաչքավորը՝ քարի վերմամշակմամբ զբաղվող Իջեւանի «Քարարտ » ընկերության տնօրեն Կարեն Գիշյանը: Մակարավանքը հիմնանորոգման կարիք ունի, հարկ է տանիքը բացել, խոնավությունից քայքայված սյուները փոխել եւ հոգեւոր կառույցի նորոգ ծածկ սարքել: Նշանավոր կոթողն այժմ աստիճանաբար քանդվում է:
Ոսկան ՍԱՐԳՍՅԱՆ
