«Հայ ազգային կոնգրես» կուսակցությունների դաշինքի դիմումի հիման վրա ՀՀ կենտրոնական ընտրական հանձնաժողովի մայիսի 13-ի՝ «ՀՀ Ազգային ժողովի համամասնական ընտրակարգով պատգամավորներ ընտրվելու մասին» թիվ 265-Ա որոշումը վիճարկելու վերաբերյալ գործով այսօր եզրափակիչ ելույթներով հանդես եկան դաշինքի ներկայացուցիչ, դիմումատու Վահե Գրիգորյանը եւ ԿԸՀ քարտուղար Արմեն Սմբատյանը: Վահե Գրիգորյանն ասաց, որ դատարան ներկայացված դիմումից բացի, ուզում է շեշտադրումներ անել: Այն մասնավորապես կապված էր ՀՀ նախագահի կողմից իր պաշտոնական լիազորություններն իրականացնելով նախընտրական քարոզչությանը: Վ. Գրիգորյանն ասաց, որ նախագահի վերահսկողության տակ են գտնվում ԿԸՀ-ն, նրա անդամները, պաշտոնատար անձինք, ոստիկանությունը, որը ծանրակշիռ նշանակություն ունի ընտրախախտումների վերաբերյալ օպերատիվ տվյալների ձեռքբերման եւ տնօրինման հարցում: Նա հորդորեց Սահմանադրական դատարանին՝ հաշվի առնել ԵԽԽՎ ստանձնած 2405 2012թ. փաստաթուղթը, նշելով, որ այն պաշտոնապես թարգմանված չլինելու պատճառով դատարանին հանձնել չի կարող: Ի դեպ, նշված փաստաթուղթը վերաբերում է ընտրություններին: Վ. Գրիգորյանը նաեւ անդրադարձավ ընդհանուր բնակչության եւ ընտրողների թվի հարաբերակցությանը եւ հայտարարեց, որ ընտրողների թիվը 20%-ով գերազանցել է բնակչության թվին: Նա ասաց, որ իրենք դիմել են դատարան՝ դատական պաշտպանության իրենց իրավունքից օգտվելու համար:
ԿԸՀ քարտուղար Արմեն Սմբատյանը որոշ առումներով կրկնեց ԿԸՀ նախագահ Տիգրան Մուկուչյանի՝ երեկ դատարանում հնչած առարկությունները: Նա հայտարարեց, որ 265-Ա որոշումն անվավեր ճանաչելու հիմքեր չկան եւ մեղադրեց դիմումատուին, որ նա շարադրել է իր մոտեցումներն ու դատողությունները, որոնք, ըստ ԿԸՀ ներկայացուցչի, իրավական արժեք չեն ներկայացնում. հարցերին տված պատասխանները չեն կարող դիտվել ապացույց, որով անվավեր ճանաչվեին ընտրությունները: Նա նաեւ գտնում էր, որ դիմումատուի նշած խախտումները թվացյալ պատրանք ստեղծելու միտում ունեն: Ա. Սմբատյանն ասաց, որ 1982 ընտրատեղամասերում համամասնական ընտրակարգով կուսակցությունների կողմից ներգրավված է եղել 19493 վստահված անձ եւ որ նրանցից ստացված դիմումների կապակցությամբ ԿԸՀ-ն կայացրել է պատճառաբանված որոշումներ:
ՍԴ նախագահ Գագիկ Հարությունյանը հայտարարեց, որ անցնում է խորհրդակցական սենյակ, սակայն «այսօր, թե վաղը կհրապարակի որոշումը»:
Բացի լրատվամիջոցներից, այսօրվա նիստին որեւէ քաղաքական ուժի ներկայացուցիչ չէր մասնակցում:
Կարդացեք նաև
Ռուզան ՄԻՆԱՍՅԱՆ
