«ՀԱԿ-ում քննարկում չի եղել, մանդատներ վերցնելու ՀԱԿ որոշում չկա: Եթե նման որոշում լիներ, ես, բնականաբար, տեղյակ կլինեի»,- «Առավոտի» հարցին՝ ճի՞շտ եք համարում մանդատները վերցնելու ՀԱԿ-ի որոշումը, ասաց «Ժողովրդավարական հայրենիք» կուսակցության նախագահ Պետրոս Մակեյանը: Թե դա ում որոշումն է՝ պարոն Մակեյանը զերծ մնաց անուններ հնչեցնելուց, ասաց, որ առաջիկայում ՀԱԿ-ում քննարկում կլինի, եւ այդ ժամանակ որոշման հեղինակն ի հայտ կգա: Իսկ մանդատները վերցնելը մեր զրուցակիցը ճիշտ է համարում, եթե դրան զուգահեռ շարունակվում է փողոցում հրապարակային պայքարը. «Այլապես, կարծում եմ, անիմաստ է պառլամենտական աշխատանք կատարել մի պառլամենտում, որտեղ աճուրդով, փողով մանդատներ են ստացել նախկին կոալիցիոն երեք ուժերը»:
«Առավոտ» օրաթերթ
