Մայիսի 29-ին Իջեւանում կայացավ լեյտենանտ Արտակ Նազարյանի մահվան գործով դատական հերթական նիստը, որի ժամանակ հարցաքննվեց գործով առանցքային վկա Արթուր Մկրտչյանը: Դատարանում ներկայացվեց գրություն այն մասին, որ գործով առանցքային մյուս վկա Արման Մնացականյանն վատառողջ է, ստացիոնար բուժման կարիք ունի: Արթուր Մկրտչյանի մայրը դատարան գրություն էր ուղարկել, որ ամբաստանյալ զինվորների ծնողներն իր որդու վրա ճնշումներ են գործադրում, ուստի դատարանը պետք է նրա նկատմամբ պաշտպանական միջոցառումներ կիրառի: Տուժողի իրավաջորդի ներկայացուցիչ, պաշտպան Ռուբեն Մարտիրոսյանը փորձեց միջորդություն ներկայացնել, որպեսզի սույն գործով դատական նիստերը տեղափոխվեն Երեւան, այնուհետեւ դատավոր Սամվել Մարդանյանին ինքնաբացարկ հայտնեց: Սակայն այս միջնորդությունները դատարանի կողմից չընդունվեցին:
Վկա Ա. Մկրտչյանը հարցերին պատասխանելիս շատ կաշկանդված էր, չէր համարձակվում նայել տուժողի իրավահաջորդ Ծովինար Նազարյանի, վերջինիս ներկայացուցչի, ամբաստանյալների կողմը: Գործով ամբաստանյալ, կապիտան Հակոբ Մանուկյանն այս առթիվ ռեպլիկ հնչեցրեց, թե Արթուր Մկրտչյանը ամաչում է իրենց նայել: Ռուբեն Մարտիրոսյանը հրապարակեց Արթուր Մկրտչյանի անցյալ տարի գրած այն գրությունը , որտեղ վերջինս նշել էր, թե ամբաստանյալ 3 զինծառայողների վերաբերյալ մեղադրական բնույթի ցուցմունքները ինքը գրել է քննիչների ծեծի եւ ճնշման տակ: Դատարանում Արթուր Մկրտչյանը հայտարարեց, թե այդ գրությունը ինքը գրել է ամբաստանյալ 3 զինվորների ծնողների ճնշման տակ, որպեսզի վերջիններս «իրենից ձեռք քաշեն»: «Պարոն դատավոր, հավայի դուրս է տալիս»,-այդ պահին զայրացած ասաց ամբաստանյալ զինվոր Ադիբեկ Հովհաննիսյանը: Պաշտպան Ռուբեն Մարտիրոսյանը տարակուսանք հայտնեց, թե այդ գրությունն ինչպես է անհետացել գործի 10 հատոր նյութերից: Ռուբեն Մարտիրոսյանը վկային հիշեցրեց, որ վերջինս 2011թ. դեկտեմբերի 14-ին «Ազատություն» ռադիոկայանի թղթակից Նաիրա Բուլղադարյանի հետ հարցազրույցում հայտնել է, որ ռազմական ոստիկանության աշխատակից կապիտան Բադալյանն ու գործով քննիչ Սարգիս Մադաթյանն ծեծելով իրեն ստիպել են ծառայակից 3 զինվորների դեմ ցուցմունքներ տալ: Ռ. Մարտիրոսյանը վկային հարցրեց՝ այդ հարցազրույցն էլ ինքը ճնշման տակ է տվե՞լ: Ա. Մկրտչյանը ոչ համոզիչ կերպով ասաց, որ դատարանի շենքի դիմաց, Երեւանի այգիներից մեկում տեղի ունեցած այդ հարցազրույցի ժամանակ իր դեմ-դիմաց գտնվել են ամբաստանյալ զինծառայողների ծնողները, որ դա ճնշում էր իր հանդեպ: Ռուբեն Մարտիրոսյանը հայտարարեց, որ այդ հարցազրույցը կայացել է անկաշկանդ ձեւով, կա դրա տեսագրությունը եւ միջնորդեց դա կցել քրեական գործին: Դատավոր Մարդանյանը հայտարարեց, որ դրան կանդրադառնան դատական հետագա փուլում: Վկան ցուցմունքներ տալով հաճախ էր օգտագործում «չեմ հիշում» բառակապակցությունը: Երբեմն դա ասում էր այնպիսի դեպքերում, երբ չհիշելն անհնար էր: Օրինակ, երբ պատասխանում էր այն հարցին, թե օրերս ե՞րբ է Ղարաբաղ բանջար հավաքելու գնացել:
Ամբաստանյալ կապիտան Հակոբ Մանուկյանի պաշտպան Հրանտ Գեւորգյանը մի քանի հարցեր ուղղեց վկային, որոնց պատասխանելով վկան ասաց, որ ինքը շուրջ 25 օր գտնվել է Բերդի ռազմական ոստիկանության կալանատանը, վկայի խոսքերով՝ «գաուբախտում»: 10 օրից հետո նրա մոտ են բերել իր եղբորը՝ նույնպես զինծառայող Վարդան Մկրտչյանին: Վերջինիս ռազմական ոստիկանություն տանելու պատճառն անհասկանալի է, քանի որ Վարդանը չի եղել դեպքի վայրում, ծանոթ չի եղել Արտակ Նազարյանի մահված հանգամանքներին: Վկա Արթուր Մկրտչյանի խոսքերով՝ ռազմական ոստիկանությունում գտնվելու առաջին 10 օրվա ընթացքում իրեն օրական մի քանի անգամ հարցաքննել են: Սակայն քրեական գործում առկա է նրա միայն 8 հարցաքննության արձանագրություն: Դատական նիստը շատ լարված էր ընթանում, հաճախ վիճաբանություններ էին տեղի ունենում պաշտպան Ռուբեն Մարտիրոսյանի եւ դատավոր Սամվել Մարդանյանի, Ռուբեն Մարտիրոսյանի եւ մեղադրող Հարություն Հարությունյանի միջեւ: Դատական հաջորդ նիստում, որը կկայանա մայիսի 30-ին, կշարունակվի Արթուր Մկրտչյանի հարցաքննությունը :
Կարդացեք նաև
Ոսկան ՍԱՐԳՍՅԱՆ
