Փակ շուկայի խնդիրը կդառնա Մաշտոցի պուրակի խնդրի նման, կամ գուցե նախագահական ընտրություններին ընդառաջ, որոշվի ամեն ինչ նախկինի պես թողնե՞լ, Aravot.am-ի հարցին՝ «Ժառանգություն» կուսակցության անդամ, Փակ շուկայի համար պայքարող Ստեփան Սաֆարյանն ասաց. «Մաշտոցի պուրակի դեպքում, շատերը նախագահ Սերժ Սարգսյանի այդ քայլը համարեցին որպես PR ակցիա, բայց ես հակված չեմ խայտառակությունը PR որակել, հատկապես այն դեպքում, երբ խայտառակությունը կատարվում է ոչ թե իրավական հիմնավորումների, այլ գեղագիտական ճաշակի դաշտում: Հետեւաբար՝ ինձ քիչ է հուզում, թե այս խնդրին Սերժ Սարգսյանն ինչպես կմիջամտի: Ինձ համար, որպես քաղաքացի, շատ էական է, որ շուկան վերադառնա իր նախկին տեսքին, թե մնացածն ի՞նչ կանեն, անկեղծ ասած՝ ինձ քիչ է հետաքրքրում»:
Դիտարկմանն էլ՝ հնարավոր համարո՞ւմ է հարցն այնքան ձգվի, որ հասնի նախագահական ընտրությունների քարոզարշավին, Սաֆարյանը պատասխանեց. «Եթե Սերժ Սարգսյանը պիտի հերթական անգամ ապացուցի, որ երկրում բոլոր խնդիրների, այդ թվում՝ Մաշտոցի պուրակի, «փակ» շուկայի հարցերի միակ լուծողն ինքն է, ապա այդ դեպքում խորհուրդ կտամ նայել «Բռնապետ» ֆիլմն ու այլեւս Հայաստանի նախագահին չտարբերել Ադրբեջանի նախագահից եւ այլեւս «չղժժալ» Ադրբեջանի նախագահի վրա, արտերկրի լրատվամիջոցների գրած հոդվածներից: Հուսամ, որ այդպես չի լինի, նախագահը կունենա նորմալ խորհրդատուներ: Այն, ինչ արեցին Մաշտոցի պուրակի պարագայում, ավելի շատ խայտառակեցին Սերժ Սարգսյանին, քան օգնեց, որովհետեւ հաստատ այդ ակցիայից հետո ես չորոշեցի, որ պիտի հավատամ Սերժ Սարգսյանին ու քվեարկեմ նրա օգտին»:
Եվա ՀԱԿՈԲՅԱՆ
