Այս պահի դրությամբ մայրաքաղաքի հիվանդանոցներում դեռեւս բուժվում է մայիսի 4-ին Հանրապետության հրապարակում փուչիկների պայթյունից տուժած 11 քաղաքացի: Նրանցից որեւէ մեկը չի գտնվում վերակենդանացման բաժանմունքում: Այս մասին Aravot.am-ը տեղեկացավ առողջապահության նախարարությունից:
Ծանր այրվածքներ ստացած քաղաքացիներին վիրահատելու նպատակով ընդամենը 2 օրով Հայաստան եկած գերմանացի բժիշկ Ադրիան Դայգլերն էլ ստիպված է եղել մեկ շաբաթից ավելի մնալ մեր երկրում: Նախարարությունից նաեւ հայտնեցին, որ
գերմանացի բժիշկը իր կատարած վիրահատությունների դիմաց գումար չի վերցրել:
Նա վիրահատել է 9 մարդու, մնացած քաղաքացիների վիրահատությունը հայաստանյան մասնագետներն են կատարել:
Կարդացեք նաև
Այս օրերին այրվածքներ ստացած քաղաքացիների բուժման համար օգտագործվել են մեծ քանակությամբ դեղորայքային քսուքներ, հիվանդանոցների պաշարը վերջանալուց հետո առողջապահության նախարար Հարություն Քուշկյանի հանձնարարականով դեղատներից եւ դեղաբազաներից հավաքվել եւ հիվանդանոցներին է տրվել դեղորայքի անհրաժեշտ քանակությունը:
Իսկ թե ընդհանուր առմամբ տուժած քաղաքացիների բուժօգնությունը որքան գումար է նստել պետբյուջեի վրա (բուժումը պետպատվերի շրջանակներում է), նախարարությունից հայտնեցին, որ առայժմ հաշվարկներ չկան, քանի որ հիվանդանոցներն իրենց կատարած ծախսերի մասին առայժմ հաշվետվություններ չեն ներկայացրել պետական առողջապահության գործակալությանը:
Հիշեցնենք, որ փուչիկների պայթյունից տուժեց 154 քաղաքացի, որից մոտ 90-ը հոսպիտալացվել էին:
Լուսինե ԲՈՒԴԱՂՅԱՆ
