Այդպես էլ Սահմանադրական դատարան չներկայացան «Հայ ազգային կոնգրես» դաշինքի անդամները: Քննության է դրված ԱԺ համամասնական ընտրակարգով ընտրությունների արդյունքները վիճարկելու մասին դաշինքի դիմումը, որը բարեխղճորեն ներկայացնում է ՀՀ փաստաբանների պալատի անդամ, փաստաբան Վահե Գրիգորյանը: Այսօր կարճատեւ ընդմիջումից հետո, ժամը 15.00-ին, երբ իր բացատրություններն էր տվել պատասխանող՝ Կենտրոնական ընտրական հանձնաժողովի նախագահ Տիգրան Մուկուչյանը, հարցերով հանդես եկավ ՀԱԿ-ի ներկայացուցիչ փաստաբանը: Նրան մասնավորապես հետաքրքրում էր, թե արդյոք ՀՀ նախագահ Սերժ Սարգսյանը, որը 10.04.2012-ին միաժամանակ հանդիպել է Նուբարաշեն վարչական տարածքի ընտրողների հետ, այնուհետեւ նույն օրը մեկնել է Արարատի մարզի Վեդի, Արարատ, Այնթապ… չի վերազանցել իր լիազորությունները, արդյոք այդ հանդիպումները եղել են աշխատանքի ժամին: Վ. Գրիգորյանը հարցեր ուղղեց նաեւ էլեկտրոնային քվեարկության արդյունքներին: Մասնավորապես՝ դիվանագիտական ներկայացուցչություններում աշխատող 238 քաղաքացիներից (այնտեղ աշխատող, գործուղման մեկնած, դիվանագետ) 195-ն են մասնակցել ընտրություններին: Ի դեպ, նրանցից 2-ն են իրենց ձայնը տվել ՀԱԿ-ին: Ըստ Տիգրան Մուկուչյանի պատասխանի՝ տարբեր կուսակցություններին տված ձայները խոսում են էլեկտրոնային համակարգով ժողովրդավարության հաղթանակի մասին: Հարցուպատասխանից հետո ՍԴ-ն անցավ խորհրդակցական սենյակ, Տիգրան Մուկուչյանի՝ անդրանիկ նիստում հնչեցրած միջնորդությունը քննարկելու: ԿԸՀ նախագահը միջնորդել էր կարճել գործի վարույթը, իսկ ՍԴ-ն որոշել էր հարցին անդրադառնալ կողմերի բացատրություները լսելուց հետո: Սահմանադրական դատարանը մերժեց այս միջնորդությունը: Վահե Գրիգորյանը խնդրեց մեկ աշխատանքային օր՝ եզրափակիչ խոսքին պատրաստվելու համար: Նա խնդրեց երկրորդ
կեսին, մինչդեռ այդ ժամանակ ԿԸՀ նախագահը պատրաստվում է մանդատներ հանձնել պատգամավորներին: Դատական նիստը նշանակվեց վաղը, ժամը 12-ին: Հիշեցնենք, որ եզրափակիչ խոսքի համար նախատեսվում է յուրաքանչյուրին 30 րոպե ժամանակ:
Ռուզան ՄԻՆԱՍՅԱՆ
