Այսօր ՀԱԿ ներկայացուցիչ Գայանե Առուստամյանը մի ինտրիգային բացահայտում արեց, թե ինչ գործարք են իրեն առաջարկել ընտրություններից առաջ ու ինչ է ստացվել, երբ ինքը չի համաձայնել գնալ այդ գործարքին: Պարզվում է` չնայած միասնական շտաբին, ընտրությունների ընթացքում ԲՀԿ-ն գործել է ՀԱԿ ներկայացուցչին հակառակ ու համագործակցել «Ժառանգության» հետ: Համենայնդեպս, այդպես ստացվեց Գայանե Առուստամյանի հայտարարությունից:
Aravot.am-ի հետ զրույցում Գայանե Առուստամյանը պատմեց, որ նախընտրական շրջանում ինքը ԲՀԿ-ից տեղեկություններ է ստացել, որ ԲՀԿ-ի ընտրազանգվածը պատրաստ է քվեարկել իր օգտին. «Շատ հստակ, շատ 100 տոկոսանոց տեղեկություններ ունեցա, որ, օրինակ,իմ ընտրատարածքում ԲՀԿ-ն քանի որ չուներ թեկնածու, եւ քանի որ կար միասնական շտաբ եւ ընտրակեղծիքների դեմ միասին պայքարելու պայմանավորվածություն, նախ՝ տեղեկություններ եկան, որ ԲՀԿ-ն իմ ձայները, այսինքն` ովքեր որ ԲՀԿ-ին համամասնական քվեարկեն, կքվեարկեն ՀԱԿ-ի թեկնածուի օգտին մեծամասնական: Դա ոչ թե ներքին համաձայնություն էր, դա շտաբների մակարդակում, թաղի մակարդակում այդպիսի տեղեկություններ ստացվեց: Ես փորձեցի դրանք ճշտել: Ու մարդիկ ԲՀԿ-ից գալիս էին իմ շտաբ` շարքային անդամներ, ինչ-որ պատասխանատուներ, ասում էին` ձեզ ենք ընտրելու: Ես հակված չեմ տարվելու նման խոստումներով, հանգիստ սպասում էի` ինչ կլինի: Արդեն ընտրությունները երբ որ մոտենում էին, փակագծերը չեմ բացելու, բայց ինձ գործարքի առաջարկ եղավ: Ես այդ գործարքից հրաժարվեցի, ես բոլոր գործարքներից հրաժարվել եմ: Հետո այդ նույն մեթոդով լուրերը եկան, որ եթե դու հրաժարվում ես, քաղաքականության մեջ մեր խաղի կանոններով չես մտնում, այսինքն` գնում ես քո նախնական սկզբունքներով, ուրեմն մենք մեր մոտեցումը փոխելու ենք եւ քո օգտին դու գնա հավաքի քո ձայները, ինչքան կհավաքես: Ադյունքում արդեն երեւաց, որ իմ ձայները Ստյոպա Սաֆարյանի ձայներից պակասեցին, որովհետեւ Ստյոպա Սաֆարյանի օգտին քվեարկություններ եղան, այսինքն` այն քվեները, որ խոստացվել էին ինձ….»: Մեր դիտարկմանը` այսինքն` այն գործարքից, որից դուք հրաժարվել եք, Ստյոպա Սաֆարյա՞նը ընդունեց` նա պատասխանեց. «Դե, դա արդեն տրամաբանական եզրահանգումն է»:
Գայանե Առուստամյանն այս բացահայտումն արեց այն ժամանակ, երբ խնդրեցինք մեկնաբանել «Հայացք» ակումբում ասուլիսում արած այն արտահայտությունը, որ «ԲՀԿ-ի ընտրազանգվածը «Ժառանգություն» է գնացել»: Մեր հարցին` եթե Ստյոպա Սաֆարյանը ԲՀԿ-ի հետ գործարքի էր գնում, ինչու էր այդ դեպքում միասնական շտաբում այդպես կռիվ տալիս, որ ԲՀԿ-ի հետ ո՞նց կարող է քայլեր անեք` նա պատասխանեց. «Ես ասում եմ` խաղեր են: Զզվելի են այդ խաղերը: Ես սա գնահատում եմ որպես նաեւ տեղական նշանակության քաղաքականություն, նաեւ լճացած, ճղճիմ, երբ որ գլուխ չես հանում հա-ն հա է, չէ-ն չէ է»:
Գայանե Առուստամյանը կանխատեսել էր, որ Ավանի թիվ 1 ընտրատարածքում, որտեղ Ստյոպա Սաֆարյանից բացի, առաջադրվել էր Ռուբեն Հայրապետյանը, կունենա առնվազն 6000 քվե. «Որովհետեւ բոլոր այն խոստումները, որ երդում-պատառով ասում էին` քեզ ենք ընտրելու, ես մտածում էի` կեսին կհամոզեն, կեսին կկաշառեն, կիսվի էլ` էլի շատ լավ է, որովհետեւ իմ ձայները 10-12 հազար են, մտածում էի` եթե կիսվի`լավ կլինի: Եթե այնտեղ էլ թվանկարչություն չլիներ, եթե այնտեղ էլ չառնեին` իմ շանսերը շատ մեծ էր իսկապես»:
Կարդացեք նաև
Հռիփսիմե ՋԵԲԵՋՅԱՆ
