Moody’s վարկանիշային գործակալությունը ղարաբաղյան հակամարտության վերսկսման հավանականությունը բնութագրել է որպես Ադրբեջանին սպառնացող «չափավոր» վտանգ։
«Ադրբեջանին շնորհված Baa3 վարկանիշը հիմնականում հիմնված է այդ երկրի կառավարության ֆինանսական բարձր ներուժի վրա, որի հիմքում ընկած է վերջին տարիներին նավթային եկամուտների աննախադեպ աճը», – ասված է Ադրբեջանի վերաբերյալ տարեկան վարկանիշային զեկույցում, որը Moody’s գործակալությունը հրապարակել է անցած շաբաթավերջին։
Ադրբեջանի վարկանիշային հեռանկարը գնահատելով որպես «կայուն»՝ գործակալությունը, այնուհանդերձ, նշում է, որ այդ երկիրը շարունակում է տնտեսապես եւ ինստիտուցիոնալ առումով թույլ մնալ։
Զեկույցում «շատ բարձր» է գնահատված Ադրբեջանի ֆինանսական ներուժը՝ շուրջ 40 միլիարդ դոլարի հասնող արտասահմանյան ակտիվների եւ ՀՆԱ-ի ընդամենը 10.5 տոկոսը կազմող «ցածր» արտաքին պարտքի շնորհիվ (4.8 միլիարդ դոլարի)։
Կարդացեք նաև
Միեւնույն ժամանակ, գործակալությունը «թույլ» է գնահատում Ադրբեջանի տնտեսական ներուժը ՀՆԱ-ի «համեմատաբար համեստ» ծավալի (2011 թ.-ին Ադրբեջանի ՀՆԱ-ն կազմել է 63.4 միլիարդ ԱՄՆ դոլար) եւ դիվերսիֆիկացման ցածր մակարդակի, ինչպես նաեւ նավթային եկամուտներից կախվածության պատճառով։
Moody’s գործակալությունը «թույլ» է գնահատում նաեւ Ադրբեջանի ինստիտուցիոնալ ներուժը՝ հիմնվելով Համաշխարհային բանկի կողմից հրապարակվող՝ կառավարման արդյունավետության եւ օրենքի գերակայության ցուցիչների վրա։
Հնարավոր վտանգների շարքում գործակալությունը անդրադառնում է հայ-ադրբեջանական հակամարտությանը՝ Լեռնային Ղարաբաղը բնութագրելով որպես Ադրբեջանին պատկանող օկուպացված անկլավ։
«Հայաստանի հետ Ադրբեջանին պատկանող Լեռնային Ղարաբաղի օկուպացված անկլավի շուրջ լարվածությունը, եւ, մասնավորապես, երկու երկրների միջեւ հակամարտության վերսկսամն հավանականությունը չափավոր վտանգ է ներկայացնում Ադրբեջանի համար։ Թեեւ հակամարտությանը կարգավորումը այս պահին հավանական չի թվում, միջազգային հանրությունը մեծապես շահագրգռված է տարածաշրջանում կայունության պահպանմամբ, քանի որ Ադրբեջանի նշանակալի էներգետիկ ռեսուրսները հատկապես կարեւոր են Ռուսաստանի եւ Եվրոպայի համար, ինչի արդյունքում շատ ցածր է դառնում հակամարտության վերսկսման հավանականությունը», – մասնավորապես ասված է զեկույցում։
«Ազատություն» ռադիոկայան
