Այսօր Ավետիք Իսահակյանի անվան գրադարանում կայացավ բանաստեղծ, լրագրող, հրապարակախոս Հակոբ Սրապյանի բանաստեղծությունների գրքի շնորհանդեսը: Հեղինակը Aravot.am-ին ասաց, որ վերնագիրը՝ «Ծանր փոշի», պատահական չի ընտրված: Ըստ նրա, այսօր մարդկանց հոգու վրա է նստած այդ փոշին. «Այս գիրքը մեր իրականությունն է: Հիմա ամեն ինչ գլխիվայր շուռ տված է. մարդիկ դադարում են մարդ լինելուց, ամոթ չունեն: Նրանք կամաց-կամաց սկսում են կորցնել իրենց մարդկային դեմքը»:
Գրողի կարծիքով, կա արհամարհանք նաեւ մշակույթի, ազգայինի, նույնիսկ՝ մարդկանց հանդեպ, ինչը գնալով խորանում է: Սրապյանը ավելացնում է, որ երկրի տերը պետք է լինի ընտանիքի հոր նման. «Պիտի սիրտը ցավի իր ազգի համար, իսկ այդ ծանր փոշին, որ կա մարդկանց հոգու վրա, նրանց մեղքով է: Ամեն դեպքում գրքում ունեմ լավատեսություն, որ հայը ի վերջո կապրի իրեն արժանի կյանքով»:
Սրապյանի կարծիքով . «Ճիշտ է՝ գրքով շատ բան կարող ես փոխել, սակայն գրականությունն ու քաղաքականությունը իրարից շատ են տարբերվում, ուրիշ բան, որ վերեւներում կարդան ու հետաքրքրվեն: Ցավոք, Հայաստանում այսօր այդպես չէ: Կարծում եմ, ընթերցողները կլինեն ուսանողները, պոեզիայի ու գրքի սիրահարները, դասախոսները, գրականագետները»:
Կարդացեք նաև
Գիրքը օրերս է տպագրվել, բայց հասցրել է արժանանալ Ստամբուլի «Ակոս» թերթի խմբագրի ուշադրությանը՝ «Ծանր փոշու» մասին հոդված է գրվել այդտեղ:
Արամ ԱՐԱՐԱՏՅԱՆ
