«Դա անհեթեթություն է»,- Aravot.am-ի հետ զրույցում ասաց ՕԵԿ պատգամավոր Իշխան Խաչատրյանը, երբ նրան հարցրեցինք ՕԵԿ-ի բաժանած ընտրակաշառքների մասին, որոնց վերաբերյալ լուրերով ողողված են ողջ մամուլը, սոցցանցերը: Առանց կրակ ծուխ լինո՞ւմ է, պարոն Խաչատրյան, հետաքրքրվեցինք մենք՝ հիշեցնելով բազմահիշատակ ջեմերի, հեռախոսների մասին: Նա պատասխանեց. «Նման բան չկա: Եթե մի տարածքում տարածքի պատասխանատուն ինքը որոշում է մուրաբա բաժանի, դա նշանակում է կուսակցությո՞ւնն է բաժանում: Կուսակցությունը նման որոշում չի կայացրել: Ընտրակաշառքը «Օրինաց երկրի» սկզբունքին չի համապատասխանում: Երբեք ՕԵԿ-ը ընտրակաշառք չի բաժանել ու չի պատրաստվում բաժանել: Հեռախոսներն անհեթեթություններ են, նման բան իրականությանը չի համապատասխանում»:
Հարցին՝ ԲՀԿ-ի տրակտորներն ընտրակաշառք են, ջեմերը՝ ո՞չ, նա պատասխանեց. «Չէ, չէ, նման բան գոյություն չունի: Տեսեք, մենք տարածքներում տարածքի պատասխանատուներ ունենք՝ կուսակցական աշխատանքներով զբաղվող մարդիկ, ովքեր որ օծանելիք են բաժանել: Խի՞ չեք ասում օծանելիք եք բաժանել: Ուրեմն, դա կուսակցական յուրաքանչյուր տարածքի պատասխանատուն է, որը որ որոշում է կայացրել, Մարտի 8-ին նվեր է տվել կանանց: Ի՞նչ անենք, դա ողջունելի է: Յուրաքանչյուր քաղաքացի պիտի այդ մոտեցումը հարգի ու գնահատի»:
Հիշեցնենք, որ ընտրակաշառքի թեման բացեց պարոն Խաչատրյանը՝ ասուլիսում նշելով, որ առավելագույն ձայներ հավաքած կուսակցություններն ընտրակաշառք են բաժանել, դրանից էլ ՕԵԿ-ին իրենց անդամներից քչերն են ձայն տվել:
Հռիփսիմե ՋԵԲԵՋՅԱՆ
Կարդացեք նաև
