Մի շարք քաղաքացիական նախաձեռնություններ ահազանգում են, որ երեկվանից վերսկսվել են Փակ շուկան քանդելու աշխատանքները: Նրանք ահազանգում են, որ արդեն քանդել են շուկայի տանիքը: Aravot.am-ը ներկա գտնվեց շուկայի շրջակայքում ի պաշտպանություն Փակ շուկայի հավաքված նախաձեռնությունների հանդիպմանը: Ճարտարապետ Արսեն Կարապետյանը մեզ հետ զրույցում կատարվածը որակեց որպես՝ վանդալիզմ և տգիտություն: Հայտնի է, որ Փակ շուկայի տեղում գործարար Սամվել Ալեքսանյանը ցանկանում է ամենամեծ «Yerevan CIty»-ն կառուցել, ուստի ճարտարապետից հետաքրքրվեցինք՝ պատրա՞ստ են պայքարել նույնիսկ այն դեպքում, երբ հակառակ կողմում Ս. Ալեքսանյա°նն է: Նա պատասխանեց. «Ճարտարապետ Աղաբաբյանը, որը նախագծել է այս շենքը, այն մարդիկ, որ պատվիրել ու կառուցել են այս շենքը մեծ դժվարությամբ, երբեք չեն լսել Ալեքսանյանի անունը: Ուստի ինձ համար լրիվ մեկ է, թե ով է հակառակ կողմում: Մեր պապերը երեսի զոռով կառուցել են այս շենքը ու թողել մեզ, որ մենք էլ փոխանցենք մեր զավակներին»:
Ա. Կարապետյանը նշեց, որ պաշտոնատար անձինք կամ չեն պատասխանում, կամ անհեթեթ պատասխաններ են տալիս: Նրա տեղեկություններով՝ նույնիսկ շենքի նախագիծ էլ չկա, «ուզում էին շուտ-շուտ անել վերջացնել, որ աղմուկ չբարձրանա»: Ճարտարապետը մեծ հույսեր չունի, սակայն ըստ նրա՝ չարձագանքել էլ չէր լինի:
Aravot.am-ը զրուցեց նաև մի շարք երևանցիների հետ, նրանք ևս կողմ չեն, որ Փակ շուկան քանդվի: Մանրամասները՝ տեսանյութում:
Տաթեև ՀԱՐՈՒԹՅՈՒՆՅԱՆ
Կարդացեք նաև
