Այսօր «Ազդակ» ակումբում Մայիսյան հաղթանակների նշանակությունը թեմայով ասուլիսի ժամանակ «Կարին»երգի, պարի ազգային համույթի գեղարվեստական ղեկավար, ազատամարտիկ Գագիկ Գինոսյանը նշեց. «Այս տոնն առանց մակդիրների կկոչեմ անկախության տոն: Անկախությունը բացարձակ արժեք է, սակայն ինքնանպատակ չէ, այն ազգի բնականոն զարգացումը ապահովելու համար է»:
Ըստ բանախոսի՝ անպարտելի բանակ պետք է ունենալ, այլ ոչ թե լավագույն. «Խոսում ենք բարոյական հաղթանակների մասին, մոռանալով բարոյական պարտությունները, անհրաժեշտ է դասեր քաղել և սխալների վրա փոխվել»:
Ազատամարտիկը առանձնացրեց մտավորականության արտագաղթի փաստը, նա համարեց դա սարսափելի փաստ. «Մենք պետք է համաքայլ քայլենք, աշխատենք տեղեկանալ և տեղեկացնել, որ պատրաստ լինենք ցանկացած մարտի»:
Հատուկ նշանակության խմբի հիմնադիր, հրամանտար Վովա Վարդանովը տոնը կարևորելով նշեց. «Երբ պատրաստ չենք անկախության՝ այն չի լինում, իսկ երբ պատրաստ ենք՝ այն մեզ հետ է: Հսկայական Հայաստանից մեզ մնաց միայն Հյուսիս-արևելյան մասը, քանի որ մենք ընդամենը պատրաստ չէինք»:
Կարդացեք նաև
Հրամանատարի կարծիքով, աշխարհին ճանաչելի ենք դարձել սովետական ժամանակներից. «Մեր մշակույթը սովետական հասարակարգից է եղել, այսօր մենք քանդում ենք այն, ինչ այդ ժամանակ ձեռք ենք բերել մեծ դժվարությամբ: Հետևաբար մեր հարևանները ատամ են սրում մեր հողի վրա, նրանք ուզում են Հայաստանը տեսնել առանց Հայաստանի»::
Անժելա ՇԱՀՈՒՄՅԱՆ
