Այսօր վարչապետ Տիգրան Սարգսյանը եկել էր Գյումրի` նորակառույց Մուշ 2 թաղամասում ծառ տնկելու ու նաև բնակարանաշինության որակին ծանոթանալու նպատակով: Կառավարության ղեկավարին ուղեկցում էր քաղաքաշինության ԲՀԿ-ական նախարար Վարդան Վարդանյանը, ով թերևս Գյումրիում վերջին անգամ էր հանդես գալիս որպես նախարար: Լրագրողները նախարարից հետաքրքրվեցին, թե իր պատկերացմամբ, ի՞նչ տեսակի ընդդիմություն կլինի ԲՀԿ-ն, որին պարոն Վարդանյանը խուսափողական պատասխան տվեց. «Ժամանակը կգա, կտեսնենք»: Իսկ այն հարցին էլ, թե արդյո՞ք վայր եք դնում Ձեր նախարարական պորտֆելը, նա դարձյալ կարճ կապեց. «Ոչ, վայր չեմ դնում, ամեն ինչ , որ սկիզբ ունի, վերջ էլ ունի»: Լրագրողները դարձյալ շարունակեցին ` իսկ ինչո՞վ եք որոշել զբաղվել պարոն նախարար, որին պատասխան պարոն Վարդանյանը կեսկատակ-կեսլուրջ պատասխանեց. «Որ որոշեմ, Ձեզ կասեմ»: Ի դեպ, լրագրողները նույն հարցը ուղղեցին նաև վարչապետ Տիգրան Սարգսյանին. մատնացույց անելով իր կողքին կանգնած ԲՀԿ-ական Վարդան Վարդանյանին, հարցրեցին` չեք ափսոսու՞մ, որ նա պորտֆելը վայր է դնում, այլևս նախարար չի լինի: «Դու՞ք եք որոշել», -ծիծաղեց վարչապետը, որին լրագրողները պատասխանեցին. «Մենք ինչի՞ ենք որոշել, ԲՀԿ-ն է որոշել»: Վարչապետն ասաց, որ ինքը կափսոսա պորտֆելները վայր դնող նախարարներին:
Նունե ԱՐԵՎՇԱՏՅԱՆ
