Aravot.am-ի հետ զրույցում գյումրեցի քաղաքագետ Գագիկ Համբարյանը կարծիք հայտնեց, որ եթե ԲՀԿ առաջնորդ Գագիկ Ծառուկյանը կոալիցիա կազմեր, ապա կհայտնվեր այն նույն կարգավիճակում, որում հայտնվեց ՕԵԿ-ը 2008-ի նախագահական ընտրություններից հետո: «Եթե ԲՀԿ-ն 450 000 ձայներ ունի և կառավարության մեջ ներկայացվելու էր 1-2 ավելի նախարարով`համեմատած 2007 թվականի ընտրությունների հետ, և չէր ունենալու մեծ լծակներ՝ իր ծրագրերը իրականացնելու, իսկ որոնք էին Ծառուկյանի ծրագրերը` մանր ու միջին բիզնեսի հովանավորություն, ներկայացրել էր հարկային խոշոր փաթեթային ծրագիր, եւ եթե իրենք չէին ունենալու լծակներ էս ամեն ինչը կիրառելու, ինքնըստինքյան՝ Ծառուկյանին ձեռնտու չէր մտնել կոալիցիայի մեջ: Ժողովուրդը լիովին կհիասթափվեր, սա մեծ վնաս կտար կոնկրետ Ծառուկյան անձնավորությանը` որպես մարդու, որն իր քարոզարշավների ժամանակ հայտարարել էր, թե ինքը գալիս է իշխանության ժողովրդի, ոչ թե նախարարական պորտֆելներ ունենալու համար»: Գագիկ Համբարյանի կարծիքով՝ եթե ԲՀԿ-ն մտներ կոալիցիա, ապա Հանրապետական կուսակցությունը Շիրակի մարզը պետք է տար «Բարգավաճին» ու ասեր` ծրագրերդ իրականացրու, տեսնեմ՝ ինչե՞ր ես անելու:
Այս քայլը, ըստ քաղաքագետի, ունի իր տրամաբանական բացատրությունը. Շիրակի մարզի 4 ընտրատարածքներից 3-ում մեծամասնական ընտրակարգով հաղթել են ԲՀԿ-ական թեկնածուները, համամասնական ընտրակարգով էլ Շիրակի մարզը երկրորդն է՝ Կոտայքից հետո, որ այդքան մեծ քանակությամբ ձայներ է տվել ԲՀԿ-ին: Իսկ այժմ, ըստ Գագիկ Համբարյանի, որքան էլ մարզպետի պաշտոնը հայեցողական լինի, ՀՀԿ-ն այն ԲՀԿ-ին չի զիջի, քանի որ մարզպետը թեեւ քաղաքներում ոչինչ չի կարող անել, սակայն գյուղերում ձայներ ապահովելու առումով մեծ դերակատարություն ունի:
Aravot.am-ը հետաքրքրվեց՝ ԲՀԿ-ի հաղթանակը Շիրակի մարզում ինչո՞վ է պայմանավորված, այս կուսակցությանն անկեղծորեն վստահո՞ւմ են, թե՞ պարզապես ՀՀԿ-ի ընտրակաշառքը տեղ չէր հասել, ինչի պատճառով էլ շահեց ԲՀԿ-ն: «ԲՀԿ-ն այս մարզում բավականին հզոր էր՝ Մարտուն Գրիգորյան, Վարդևան Գրիգորյան, Սամվել Բալասանյան, Մուշեղ Պետոյան, Ռոբերտ Զաքարյան: Նրանք քաղաքական և տնտեսական ոլորտում հայտնի գործիչներ են, օրինակ` պարոն Բալասանյանը ահռելի գարեջրի գործարանի տեր է, մարդը էստեղ աշխատատեղեր է բացել, դուք կարծում եք՝ ինչի համար պետք է չընտրեին, վերջապես մարդկանց աշխատանք է տալիս, նույնը՝ մնացածը. քիչ, թե շատ, բայց որպես գործարարներ՝ բոլորն էլ ունեն աշխատատեղեր, էստեղ առևտուր չէ, էստեղ խանութատեր չէ, գործող պատգամավորներ են, որոնք ունեն իրենց դիրքը, շրջապատը, պատիվն ու հարգանքը, ո՞վ է ասել, որ իրենք չպետք է ընտրվեին: ՀՀԿ-ի պարտության պատճառը ընտրակաշառքը չէ. մեր ժողովուրդը արդեն սովորել է՝ ընտրակաշառք կարող է վերցնել ե՛ւ ՀՀԿ-ից, ե՛ւ ԲՀԿ-ից ե՛ւ «Օրինաց երկրից», ե՛ւ ՀԱԿ-ից, բայց ընտրել նրան՝ ում ուզում է: Այստեղ խնդիրը Գյումրիում ստեղծված ոչ նորմալ բարոյահոգեբանական մթնոլորտի մեջ է»,- ասում է մեր զրուցակիցը` ՀՀԿ-ի պարտության հարցում մեղադրելով Շիրակի մարզի ՀՀԿ կառույցի պատասխանատուին` Վարդան Ղուկասյանին:
Այս թեմայի շուրջ Գագիկ Համբարյանի մեկնաբանությունները ընթերցեք վաղվա տպագիր «Առավոտում»:
Կարդացեք նաև
Նունե ԱՐԵՎՇԱՏՅԱՆ
