Եվրոպայի խորհրդի խորհրդարանական վեհաժողովի (ԵԽԽՎ) մշտական հանձնաժողովի այսօր Տիրանայում կայացած նիստում քննարկվել է Հայաստանի խորհրդարանական ընտրությունների վերաբերյալ ԵԽԽՎ դիտորդական առաքելության զեկույցը:
Քննարկմանը մեր երկրից մասնակցել է միայն ԵԽԽՎ-ում Հայաստանի պատվիրակության ղեկավար Դավիթ Հարությունյանը, որն «Առավոտի» հարցին, թե քննարկման ընթացքում ի՞նչ գնահատականներ հնչեցին՝ պատասխանեց. «Ընդհանուր առմամբ բանավոր գնահատականները եւ գրավոր տեքստը իրար չեն համապատասխանում: Գրավոր տեքստը շատ ավելի կոշտ է, բանավոր գնահատականները՝ անհամեմատ ավելի բարձր. Հայաստանում ժողովրդավարության կտրուկ աճի մասին էին խոսում բանավոր: Խոսում էին, թե ինչպիսի իրավիճակ էր տեղամասերում, ինչպիսի քաղաքական պայքար կար, ինչպես էին արձագանքում զանգվածային լրատվամիջոցները: Բայց գրավոր տեքստը, ես կարծում եմ՝ լուրջ քննադատության տեղ ունի:
Ես ներկայացրեցի իմ դիտողությունները գրավոր տեքստի հետ կապված: Սակայն ինչպես ԵԽԽՎ-ում ընդունված է՝ հարցը նախ քննարկվում է բյուրոյում եւ, որպես կանոն, ներկայացված զեկույցը ոչ թե հաստատվում է, դառնում է բանաձեւ, այլ ուղղակի լսվում եւ հաստատվում է, որ լսեցին այդ զեկույցը:
Ցավոք սրտի, կային նաեւ մի շարք գործընթացային խախտումներ. դիտորդական առաքելության անդամները այդ զեկույցը չէին ստացել եւ փաստորեն զեկույցը պատրաստել է միմիայն պատվիրակության ղեկավարը: Ճիշտ է, այսօր այդ զեկույցն արդեն ուղարկվել է պատվիրակության անդամներին, բայց կարծես թե ամեն ինչ շուռ տված է՝ հերթականության տեսանկյունից: Սկզբից պետք է դիտորդական առաքելություն իրականացրած հանձնաժողովի անդամները քննարկեին եւ ներկայացնեին իրենց առաջարկությունը, որից հետո միայն այդ զեկույցը հրապարակվեր:
Կարդացեք նաև
Այնուամենայնիվ՝ ծանոթ ոճ է. ԵԽԽՎ-ն, ինչպես արդեն բազմիցս նշել ենք, քանի գնում՝ հայտնվում է սուր ճգնաժամի մեջ եւ հետզհետե վերածվում է արժեքների կազմակերպությունից զուտ շահերի կազմակերպության»:
