Մեր երկրի օրենքով պետական բարձրաստիճան պաշտոնյաներին արգելվում է գործարարությամբ զբաղվել: Սակայն, ինչպես ասում են՝օրենքները ստեղծվում են, որպեսզի շրջանցվեն: Հայաստանի «ամենաերկարակյաց մարզպետ» Արմեն Ղուլարյանի որդին՝ Նարեկը, բաժնետեր է Իջեւանում ավտոգազալցավորման ճնշիչ կայաններ աշխատեցնող «Առամնա» եւ «Դանամա» ՍՊԸ-ներում: Ի դեպ, «Առամնա» ՍՊԸ-ի ավտոգազալցավորման կայանը երկար ժամանակ Իջեւանի տարածաշրջանում միակն էր, այդտեղ մշտապես մեքենաների հերթեր էին, կայանի տերերը մեծ շահույթներ էին ստանում: Այդ կայանի պատին փակցված է ՀՀԿ-ի «Հավատանք, որ փոխենք» կարգախոսը: Տավուշի մարզպետի կինը՝ Սիլվա Մկրտումյանը, Իջեւանի զորամասին հաց մատակարարող «Քարավանատուն» ՍՊԸ-ի երկու փայատերերից մեկն է:
Ոսկան ՍԱՐԳՍՅԱՆ
