«6 ամիս անց ԲՀԿ-ն կվերադառնա կոալիցիա և կպաշտպանի գործող նախագահին»,-այսօր լրագրողների հետ հանդիպման ընթացքում այսպիսի կարծիք հայտնեց ՍԻՄ նախագահ, ԱԺ պատգամավոր Հայկ Բաբուխանյանը: Նա, մեկնաբանելով ԲՀԿ-ՀՀԿ հարաբերությունները ընտրությունների ընթացքում, նկատեց. «Ընտրությունները ցույց տվեցին, որ կոալիցիոն գործընկերներն այնքան էլ վստահելի չեն, և եթե այդքան էլ վստահելի չեն, գուցե ավելի լավ է, որ կոալիցիա չկազմեն»: Դառնալով այն հարցին՝ արդյոք ԲՀԿ-ն իրական ընդդիմություն է, պարոն Բաբուխանյանը նշեց. «Հայաստանյան քաղաքական դաշտում ես լուրջ ընդդիմադիր ուժ այդպես էլ չեմ տեսնում: ՀՀՇ-ի գործունեությունը բոլորին է հայտնի, իսկ ԲՀԿ-ն՝ որպես ընդդիմադիր կուսակցություն դեռ պիտի իրեն ցույց տա, քանի որ ընդդիմադիր կուսակցությունը միայն այն չէ, որ ամեն ինչին դեմ խոսի»: Հարցին՝ ի°նչն է հիմք տվել մտածել, որ ԲՀԿ-ն ,միևնույն է, վերադառնալու է, Հ. Բաբուխանյանը պատասխանեց. «Ուսումնասիրելով ԲՀԿ-ի կուսակցական դիրքորոշումները, գաղափարական դրսևորումները՝ գալիս եմ այն եզրակացության, որ այդ կուսակցությունը դժվար երկար ժամանակ կարողանա մնալ ընդդիմադիր դաշտում: Ուստի, իմ կարծիքով, ԲՀԿ-ի համար լավագույն ելքը կլինի պաշտպանել Սերժ Սարգսյանի թեկնածությունը»: Դառնալով «Ժառանգությանը»՝ Հ. Բաբուխանյանը նշեց. «Ժառանգության կշիռն այնքան չէ, որ կարողանա կոալիցիայում աշխատանք կատարել: Այդ կուսակցությունը՝ որպես նարնջագույն իդեալներով ապրող կուսակցություն շարունակում է իր գործունեությունը ԱԺ-ում: Իսկ այն նարնջագույն գործընթացները, որ տեղի են ունենում մեր երկրում, վտանգավոր են»: Հ. Բաբուխանյանը նաև քննադատեց ԱՄՆ պետդեպարտամենտի զեկույցը:
Իսկ որպես պատգամավոր՝ պարոն Բաբուխանյանը մի շարք օրենսդրական փոփոխություններ է առաջարկելու, այդ թվում՝ նաև Կրթության մասին օրենքում:
Տաթև ՀԱՐՈՒԹՅՈՒՆՅԱՆ
