Գենետիկորեն փոփոխված սերմեր մեր հանրապետությունում չկան: Այսօր «Հենարան» ակումբում հայտարարեց «Հայաստանի ագրարագյուղացիական միավորում» հ/կ-ի նախագահ Հրաչ Բերբերյանը` հակադարձելով բնապահպանների այն մտահոգությանը, թե արտերկրից Հայաստան են ներկրվում գենետիկորեն ձեւափոխված սերմեր, որոնք մարդու առողջության եւ բնության համար խիստ վտանգավոր են: Ըստ պարոն Բերբերյանի, նման լուրեր տրածողները «թուրքեր են»:
Պարոն Բերբերյանի խոսքերով. «Մի քանի տարի առաջ երկու-երեք կին սումկաները թեւի տակ վազվզում էին եւ հստակ գիտեինք, որ ֆինանսավորվում են մի միջազգային կազմակերպությունից, համենայնդեպս՝ նրանք Հայաստանի շահերը չէին ներկայացնում, եւ եթե արմատները նայես, սա խփում է մեր տնտեսությանը եւ նույնիսկ ազգային անվտանգության հարց է: Սերմից գալիս – հասնում ենք արտահանման ծրագրի ձախողմանը, որովհետեւ, եթե սերմը գենետիկ է, բնականաբար նրա արտադրանքն էլ է գենետիկ, նրա վերամշակած տեսակն էլ է գենետիկ»:
Շուկաներում վաճառվող տեխնիկական լոլիկը, որն, ի տարբերություն սովորական լոլիկի, ավելի չորային է, նույնպես վտանգավոր չէ առողջության համար: Այն նախատեսված է տոմատի արտադրության համար, քանի որ տեխնիկական լոլիկներից 2 անգամ ավելի շատ տոմատ է ստացվում, քան`սովորական լոլիկից: Ըստ նրա. «Եթե տեխնիկական լոլիկը խփում ես պատին՝ չի կոտրվում»:
Պարոն Բերբերյանի հավաստմամբ` աշխարհում գոյություն չունեն գենետիկորեն փոփոխված բանջարեղեն կամ մրգեր: Մասնագետի խոսքերով` գենետիկորեն ձեւափոխված են միայն եգիպտացորենը, սոյան ու ցորենը:
Ինչ վերաբերում է գյուղացուն, էլիտարի անվան տակ հատկացված անորակ ցորենին, ինչի արդյունքում ցորենի բերքը գաճաճ է ստացվել եւ կոմբայնը չի կարողանում այն հնձել, ապա Հրաչ Բերբերյանն ասաց, որ ցորենի սերմնաբուծության զարգացման ծրագիրը հանրապետությունում ձախողվել է. « Ռուսաստանից ներկրած սերմերը բարձր որակի են ու բարձր բերքատվություն ունեն, բայց գյուղնախարարությանը վերադարձվել է անորակ սերմացու եւ երկրոդ փուլում, երբ բախշվել է սերմացուն, այլ գյուղացիական տնտեսություններ տուժել են»:
Կարդացեք նաև
Լուսինե ԲՈՒԴԱՂՅԱՆ
