Երեկ Սիսիանի Դաստակերտ գյուղում բոխի հավաքելու գնացած 53-ամյա Վրեժ Գալստյանը՝ մեկ ու կես մետր չափերի հասնող գյուրզա տեսակի օձից դաստակին խայթոց ստանալուց եւ հազիվ կենդանի մնալուց հետո, դեռ մտադիր է հիվանդանոցիցի դուրս գրվելուց հետո բոխի հավաքելու գնալ:
53-ամյա Վրեժն ասում է, որ դրանով է իր ընտանիքը պահում եւ վերջնական բուժում ստանալուց հետո կրկին կանցնի իր գործին: Տուժածը խոստովանում է, որ նույնիսկ այդ փորձության միջով անցնելուց հետո չի վախենում օձերից:
Հիշեցնենք, որ մայիս 24-ին ժամը 11-ի սահմաններում դաստակից օձի խայթոցով Սիսանի բժշկական կենտրոն տեղափոխված Վրեժը խիստ ծանր ու արյունաքամ վիճակում էր հայտնվել ինքնաբուժման փորձ անելուց հետո: «Հիվանդը թույնի տարածումը կանխելու նպատակով դանակով կտրտել էր իր հյուսվածքները, ինչի արդյունքում վնասել էր արյունատար անոթները եւ սկսել էր արնաքամ լինել: Նա հիվանդանոց է տեղափոխվել արդեն իսկ շոկային վիճակում: Բարեբախտաբար ժամանակին հասցվել է հիվանդանոց, որտեղ ձեռնարկվել են անհրաժեշտ բժշկական միջոցառումներ: Նրա վիճակն այժմ լավ է եւ 2-3 օրից դուրս կգրվի հիվանդանոցից», – տեղեկացնում է Սիսիանի բժշկական կենտրոնի գլխավոր բժիշկ Արտյոմ Թադեւոսյանը:
Այս տարի Սիսիանի Ույծ գյուղում էլ կարիճի խայթոցի մեկ դեպք է եղել:
Կարդացեք նաև
Մերի ՍՈՂՈՄՈՆՅԱՆ
