Հատվածներ ՀՀԿ-ական Մանվել Բադեյանի հարցազրույցից:
– Ինչո՞ւ ԲՀԿ–ն հրաժարվեց կոալիցիայից, մանավանդ որ վերջին երեք շաբաթների ընթացքում երկուստեք հանդիպումներ, բանակցություններ էին գնում այս թեմայով։ Չհաջողվե՞ց ՀՀԿ–ին համոզել առանց մեծ զիջումների կոալիցիա կազմել, թե՞…
– ՀՀԿ-ն նախ պաշտոնապես չի էլ առաջարկել կոալիցիա ձեւավորել, անշուշտ, կոնսուլտացիաներ գնացել են բոլոր քաղաքական ուժերի, այդ թվում՝ ԲՀԿ-ի հետ։ Այդ կոնսուլտացիաների ընթացքում ակնհայտ է դարձել, որ կոալիցիոն կառավարություն կազմելն անիմաստ է, քանի որ, ըստ երեւույթին, ծրագրերը տարբեր են ՀՀԿ-ի եւ ԲՀԿ-ի։ Իսկ կոալիցիան կարող է կազմվել, երբ ընդհանրական խնդիրներին բոլոր կողմերի տեսլականներն էլ նույնն են։ Ես դրանում արտասովոր ոչինչ չեմ տեսնում, եւ մեզ համար պրոբլեմ կլիներ, եթե չունենայինք քաղաքական մեծամասնություն, եւ կառավարություն ստեղծելն էլ խնդիր չէ:
– Իսկ մտավախություններ չկա՞ն, որ ԲՀԿ–ն իսկապես ընդդիմադիր դաշտում կգործի։ Դուք առհասարակ դա պատկերացնո՞ւմ եք։
Կարդացեք նաև
– Այո, եթե կոալիցիա չի մտնում, նշանակում է ընդդիմադիր դաշտում է։ Սակայն կարծում եմ, որ ԲՀԿ-ն չի դառնա արմատական ընդդիմություն, այլ կլինի կառուցողական, եւ դրա մեջ վատ բան չեմ տեսնում։
– Պարոն Բադեյան, չի գնա ռադիկալ քայլերի, որովհետեւ անմիջապես ճնշումների՞ կենթարկվի իշխանության կողմից։
– Չէ, չէ, չէ… Հենց այն պատճառով չի գնա, որովհետեւ գաղափարախոսության առումով նա արմատական ընդդիմություն չի, Դաշնակցություն չի, օրինակ՝ սոցիալիստական ուժը ներկայացնող կամ ՀԱԿ չի, այսինքն՝ արմատական ընդդիմություն դառնալու համար գաղափարական խիստ տարբերություն կա։
– Հիմա ՀՀԿ–ի վրա, փաստորեն, ընկնում է երկիրը կառավարելու ողջ պատասխանատվությունը, եւ Ձեր կուսակցությունն է պատասխան տալու բոլոր թերացումների համար։ Այս առումով, փաստորեն, ԲՀԿ–ն Ձեզ այնքան էլ հաճելի վիճակում չդրեց՝ հայտ ներկայացնելով ընդդիմադիր դաշտում գործելու։
– Փորձը ցույց տվեց, որ նախորդ անգամ էլ իրենք որոշ մեղքերը բարդում էին ՀՀԿ-ի վրա եւ իրենք մնում էին «սպիտակ եւ փափուկ»։ Այնուամենայնիվ իրենք պատասխանատվությունից չկարողացան խուսափեին եւ մեզանից պակաս ձայներ հավաքեցին։ …Միգուցե ՀՀ նախագահի կողմից պատրաստակամություն է եղել կոալիցիա ձեւավորել, բայց դա հետապնդել է ընդամենը հասարակությանը կոնսոլիդացնելու խնդիր, որովհետեւ այն մարտահրավերները, որ կան մեր երկրի առաջ, կոնսոլիդացիա են պահանջում, բայց կառավարման տեսակետից կոալիցիան անհրաժեշտ չի, նույնիսկ հակառակի պարագայում դա անհասկանալի է։
Լուսինե ՇԱՀՎԵՐԴՅԱՆ
«Հրապարակ»
