Մայիսի 24-ին Փարաջանովի թանգարանում կայացավ «Գալիցիայի երեք պատմություններ» ֆիլմի շնորհանդեսը` Հայաստանում մշակութային բազմազանության միջոցառումների եւ «Լեհական օրեր» ծրագրի շրջանակներում: Նախագիծը գտնվում է Հայաստանում Լեհաստանի եւ Ուկրաինայի դեսպանատների, ՄԱԿ-ի Մշտական համակարգողի հովանու ներքո:
Փաստագրական ֆիլմը նկարագրում է Երկրորդ համաշխարհային պատերազմի ընթացքում եւ դրանից հետո Արեւելյան Եվրոպայի Գալիցիա տարածաշրջանում (այժմ բաժանված է Լեհաստանի եւ Ուկրաինայի միջեւ) տեղի ունեցած իրադարձությունները: Դարեր շարունակ Գալիցիան եղել է էթնիկ խմբերի հայրենիքը` ուկրաինացիների, լեհերի, հայերի եւ հրեաների:
Հայաստանում ՄԱԿ-ի մշտական համակարգող, ՄԱԶԾ մշտական ներկայացուցիչ Դաֆինա Գեռչեւան ասաց, որ ֆիլմը հարգանքի յուրօրինակ տուրք է բազմաթիվ անհայտ հերոսների հիշատակին. «Հասարակ մարդիկ, ովքեր, անտեսելով վեր խոյացող սարսափի ու վտանգի սպառնալիքները, արել են այն, ինչ ճիշտ էր, եւ ոչ թե այն, ինչ հեշտ էր»:
Հայաստանում Ուկրաինայի դեսպան Իվան Կուխտան նշեց, որ ֆիլմի ցուցադրությունը Փարաջանովի թանգարանում խորհրդանշական է. «Փարաջանովը մարդ է, որը ազգությամբ հայ է, ծնվել է Վրաստանում եւ բանտ նստել ուկրաինական նացիոնալիզմի համար»: Դիվանագետը նաեւ հավելեց, որ ցավալի պատերազմական դեպքերին ծանոթ է ոչ թե ֆիլմերից կամ գրքերից, այլ պապիկի մասին պատմություններից, որը զոհվել է Ուկրաինայի ազատագրության համար պայքարում:
Կարդացեք նաև
Հավելենք, որ «Գալիցիայի երեք պատմություններ» ֆիլմը ցուցադրվել և մեծ հաջողություն է ունեցելԿաննի, Համբուրգի կինոփառատոնների շրջանակներում, ինչպես նաեւ ԱՄՆ-ում, Ուկրաինայում եւ Կանադայում:
Գոհար ՀԱԿՈԲՅԱՆ
