Իր վերջին հարցազրույցներում Նոր ժամանակներ կուսակցության նախագահ Արամ Կարապետյանը բավականին թերահավատ էր վերաբերվում ԲՀԿ-ի` կոալիցիայից ձերբազատվելու հեռանկարին` վստահություն հայտնելով, որ Գագիկ Ծառուկյանը կընտրի «արթուրբաղդասարյանացման» ճանապարհը: Միաժամանակ ՆԺԿ նախագահը նշում էր, որ ԲՀԿ-ի` կոալիցիայից հրաժարվելու տարբերակ չի բացառվում, եթե «դրսից ճնշումներ» չլինեն:
Այսօր պատասխանելով Aravot.am-ի հարցին` Ձեզ անակնկալի՞ բերեց ԲՀԿ-ի հայտարարությունը` կոալիցիա կազմելու աննպատակահարմարության վերաբերյալ, պարոն Կարապետյանն ասաց. «Իմ հիշողության մեջ միակ դեպքն է, որ ԲՀԿ-ն քաղաքական կեցվածք դրսեւորեց եւ քաղաքական հայտարարություն արեց: Ես շատ ողջունում եմ, եթե, իհարկե, սա խաղ չէ` կապված Ռոբերտ Քոչարյանի դերի, հեռանկարի հետ: Այդ պարագայում այս ամենն առաջիկայում լուրջ դեր կարող է խաղալ»:
Նելլի ԳՐԻԳՈՐՅԱՆ
