Քաղաքագետ Սուրեն Սուրենյանցն այսօր ասուլիսում կարծիք հայտնեց, թե Ազգային ժողովի ընտրություններում ՀՅԴ-ն պարտվեց, որովհետեւ ընտրարշավը կազմել էր սխալ մարտավարական հնարքների վրա : Ըստ նրա, ՀՅԴ-ն հրաժարվեց սոցիալական կարգախոսների դոմինանտությունից՝ շեշտը դնելով հայ դատական գաղափարների վրա. «Մեր հասարակությունը ցույց տվեց, որ հայ դատական գաղափարները առաջնային չեն»:
Քաղաքագետի գնահատականները իրականության հետ բացարձակ կապ չունեցող համարեց ՀՅԴ անդամ Արծվիկ Մինասյանը: «Նշանակում է, որ Սուրենյանցը չի էլ տիրապետում Դաշնակցության նախընտրական ծրագրին եւ քարոզչությանը չի էլ հետեւել: Դաշնակցությունն արձանագրել է հետնահանջ, բայց ոչ ընտրարշավի արդյունքում, այլ՝ փողի ու զոռբայության: 4 հենասյուներից բաղկացած նախընտրական ծրագիր ունեինք՝ սոցիալական, տնտեսական, ժողովրդավարական, կամ, ինչպես ասում է Սուրենյանցը՝ հայ դատական գաղափարաբանություն: Այլ բան, որ չնկատողները չնկատեցին, նրանք, որոնք չեն ուզում տեսնել մեր միասնական պլատֆորմը, չտեսան, մնացածն արդեն նախասիրության հարց է» ,- Aravot.am-ին ասաց պարոն Մինասյանը:
Արփինե ՍԻՄՈՆՅԱՆ
