«Ասենք թե կոալիցիա չի կազմում ԲՀԿ-ն, բայց արդյոք նախարարական պաշտոններից նույնպես հրաժարվո՞ւմ է»,-Aravot.am-ի հետ զրույցում անդրադառնալով ԲՀԿ-ի հայտարարությանը, որով նպատակահարմար չեն համարում մասնակցել կոալիցիոն կառավարության ձեւավորմանը՝, ասաց Հայաստանի դեմոկրատական կուսակցության նախագահ Արամ Սարգսյանը:
Նկատենք, որ ԲՀԿ-ի հայտարարության մեջ նախարարական պորտֆելների մասին ոչինչ չի ասվում, սակայն, Aravot.am-ի տեղեկություններով, ամսի 31-ին կայանալիք խորհրդարանի առաջին նիստի օրը, ԲՀԿ-ական բոլոր նախարարները կհրաժարվեն իրենց պորտֆելներից` սահմանված կարգի համաձայն: Եթե իրադարձությունները հենց այս սցենարով զարգանան, ապա, Արամ Սարգսյանի կարծիքով, դա կնշանակի, որ ԲՀԿ-ն ամբողջովին ձերբազատվում է կոալիցիոն պարտավորություններից եւ միանգամայն այլ զարգացումներ են ենթադրվում: Եթե չեն հրաժարվում եւ ինչ-ինչ պատրվակներով պահում են պորտֆելները, ինչպես ժամանակին արեց ՀՅԴ-ն, ապա, ըստ մեր զրուցակցի, այդ քայլն ավելի «բլեֆի» է նմանվում:
Ամեն դեպքում, ԲՀԿ-ի այսօրվա հայտարարությունը ՀԴԿ-ում գնահատում են «շատ լուրջ քայլ», բայց դեռեւս չեն կարողանում հասկանալ, թե դա ինչ «կոմպրոմիսի արդյունք է», քանի որ, մեր զրուցակիցը չի կարծում, թե այս ամբողջն աշխարհաքաղաքական գործընթացներից դուրս է:
«Բավականին հետաքրքիր իրավիճակ է ստեղծվում նախագահական ընտրություններից առաջ, որտեղ մեր աշխարհաքաղաքական «սպոնսորների» գործունեությունն ավելի հստակ կերեւա»,- ասաց ՀԴԿ նախագահը:
Կարդացեք նաև
Նելլի ԳՐԻԳՈՐՅԱՆ
