«Մեր հայտարարության մեջ ամեն ինչ շատ հստակ ասված է: Խորհրդարանում մենք լինելու ենք շատ ակտիվ խմբակցություն եւ աշխատելու ենք»,-Aravot.am-ի հետ զրույցում ասաց ԲՀԿ քարոզչական խմբի պատասխանատու Նաիրա Զոհրաբյանը` անրադառնալով կուսակցության կայացրած որոշմանը, որով ԲՀԿ-ն նպատակահարմար չի գտնում մասնակցել կոալիցիոն կառավարության ձեւավորմանը:
Aravot.am-ի հարցին` ընտրակեղծիքների վերահսկման միասնական շտաբի հիմքով հնարավո՞ր է համագործակցություն ՀԱԿ-ի եւ ՀՅԴ-ի հետ, տիկին Զոհրաբյանը պատասխանեց. «Նման խնդիրներ դեռեւս չեն քննարկվել, բայց մենք մշտապես կողմ ենք լինելու այն նախաձեռնություններին, որոնք բխելու են մեր երկրի եւ մեր ժողովրդի շահերից` անկախ նրանից, թե այդ նախաձեռնություններն ովքեր կներկայացնեն»: Դիտարկմանը` ԲՀԿ-ն դառնում է ընդդիմությո՞ւն, Նաիրա Զոհրաբյանը մեկ անգամ եվս արձագանքեց. « Մենք մշտապես կողմ ենք լինելու այն նախաձեռնություններին, որոնք բխելու են մեր երկրի եւ մեր ժողովրդի շահերից` անկախ նրանից, թե այդ նախաձեռնություններն ովքեր կներկայացնեն եւ պաշտպանելու ենք բոլոր այն նախաձեռնությունները, որոնց հիմքում մեկ նպատակ կա` հանուն ժողովրդի բարեկեցության»:
Նելլի ԳՐԻԳՈՐՅԱՆ
