Մայիսի 22-ին Իջեւանում, Տավուշի մարզի առաջին ատյանի դատարանում կայացավ Իջեւան քաղաքի 24-ամյա բնակիչ, նախկինում դատված, ամուրի Վազգեն Օհանյանի դատավարության հերթական նիստը: Նա մեղադրվում է ՀՀ քրեական օրենսգրքի 34/138 հոդվածի 1-ին մասով եւ 147 հոդվածի 1-ին մասով:
Վազգենը 2011թ. հոկտեմբերի 29-ի լույս 30-ի գիշերը ալկոհոլ օգտագործած վիճակում մուտք է գործել Իջեւան քաղաքի 70-ամյա բնակչուհի Սուսաննա Բեկնազարյանի տուն, բռնություն գործադրելով եւ բռնության սպառնալիքներ տեղալով ` տարեց կնոջ նկատմամբ բռնաբարության փորձ կատարել:
Նիստում հարցաքննվեցին գործով վկաներ Նոդար Օթարյանը, Սամվել Բեջանյանը, Էդգար եւ Շավարշ Խաչատրյանները, Անժելա Ավետիսյանը: Եղբայրներ Էդգար եւ Շավարշ Խաչատրյանները եւ Անժելա Ավետիսյանը ցուցունք տվեցին, որ հոկտեմբերի 29-ի երեկոյան իրենց տուն է եկել հեռավոր ազգական Վազգեն Օհանյանը, իրենք այդ ժամանակ սնվելիս են եղել: Խաչատրյանների տանը Վազգենը հյուրասիրվել է, օղի խմել, նաեւ մի շիշ օղի է տարել այնտեղ: Գիշերվա ժամը 2-ի սահմաններում տանտերերն արդեն հարբած Վազգենից պահանջել են հեռանալ եւ նրան ուղեկցել են մինչեւ իրենց տան դուռը:
Կարդացեք նաև
25-ամյա Անժելա Խաչատրյանը 24 տարեկան Վազգեն Օհանյանի մասին դատարանում ցուցմունք տալիս մի քանի անգամ նրա վերաբերյալ օգտագործեց «էրեխեն» արտահայտությունը: Տուժողի թոռ Գարուշ Խաչատրյանը ներկայումս շարունակում է ժամկետային ծառայությունը հեռավոր սահմանագոտում, ու դատարանում հրապարակվեցին նրա նախաքննական ցուցմունքները: Ըստ դրանց՝ Գարուշ Խաչատրյանը Իջեւան արձակուրդ գալով՝ այցելել է տատին, գիշերել նրա տանը: Գիշերվա 3-ին նա արթնացել է ՝ կողքի սենյակից լսելով տատի օգնության կանչերը եւ անկողնում պառկած տատի վրա տեսել է Վազգեն Օհանյանին: Գարուշը տատի վրայից քաշել է Վազգենին, երկու անգամ ապտակել նրան եւ կրծքից քաշելով՝ սենյակից դուրս հանել: Գարուշն իրենց հեռավոր բարեկամ Վազգենին տատի ննջասենյակում հարցրել է , թե նա ինչ է անում իր տատի տանը: Վերջինս պատասխանել է, թե եկել է հորեղբոր կնոջը տեսության:
Դատարանում ցուցմունք տվեց նաեւ տուժող 70-ամյա Սուսան Բեկնազարյանը: Դատավոր Ռաֆիկ Մելքոնյանը տուժողի հարցաքննությունն անցկացրեց դռնփակ կարգով: Ամբաստանյալ Վազգեն Օհանյանը կարծես թե համաձայնվել էր դատարանում ցուցմունք տալ, սակայն հետո հրաժարվեց դրանից: Նա դատարանում միայն գողության փորձի մեջ իրեն մեղավոր համարեց: Դատավորը հրապարակեց նրա նախաքննական ցուցմունքները: Նախաքննության փուլում Վազգենն ընդունել է մեղքը: Դատավարության ընթացքում հրապարակված նախաքննական ցուցմունքներում նա հայտնել է, որ հոկտեմբերի 29-ին ինքն այցելել է իր հեռավոր բարեկամ Խաչատրյանների տուն, այնտեղ հյուրասիրվել: Գիշերվա 2-ին այնտեղից տուն գնալու ճանապարհին որոշել է մտնել Սուսան Բեկնազարյանի տուն եւ նրա հետ սեռական հարաբերություն ունենալ: Վազգենը տեղյակ է եղել, որ ծեր կինը միայնակ է ապրում, նրա թոռը գտնվում է ժամկետային ծառայության մեջ: Վազգենը մտել է Սուսան Բեկնազարյանի ննջասենյակ, ձեռքերը դրել նրա կրծքերին: Տարեց կինն արթնացել է, թոռանն օգնության կանչել: Վազգեն Օհանյանը բարձրացել է կնոջ մահճակալի վրա, ձախ ձեռքով փակել է կնոջ բերանը, աջով փորձել նրա վրայի վերմակը հեռացնել: Բռնաբարության կատարելուն խանգարել է կնոջ՝ օգնության հասած թոռը՝ Գարուշ Խաչատրյանը, ով հարվածելով եւ քաշելով՝ Վազգենին դուրս է բերել պատշգամբ: Վազգեն Օհանյանը բռնաբարության փորձի մեջ իր մեղքն ընդունել է նաեւ նախաքննության ժամանակ Սուսան Բեկնազարյանի եւ Գարուշ Խաչատրյանի հետ առերեսման ժամանակ:
Մայիսի 22-ի դատական նիստը հետաձգվեց, քանի որ դատավոր Ռաֆիկ Մելքոնյանն այդ օրը նշանակված այլ դատական գործ ուներ: Հաջորդ դատական նիստը նշանակված է հունիսի 1-ին: Այդ նիստում կհետազոտվեն քրեական գործում առկա փաստաթղթերը:
Ոսկան Սարգսյան
