«Սարդարապատ» շարժման նախաձեռնող խմբի անդամ Գարեգին Չուգասզյանը ընտրական գործընթացները նմանեցնում է Կալիգուլայի ժամանակաշրջանին: Aravot.am-ի հարցին ի պատասխան՝ եթե ձեր «Այլընտրանքային ընտրությունների միջոցով իշխանափոխության եւ նոր հանրապետության հիմնադրման ճանապարհային քարտեզի» նախագիծը կյանքի կոչվի, այդ դեպքում, ո՞ւմ ժամանակաշրջան կտեղափոխվենք, Չուգասզյանը պատասխանեց. «Ամեն համեմատություն իր կիրառման սահմաններն ունի: Հիմա ես տեսնում եմ հետեւյալ վիճակը. տեղի է ունենում այն, ինչ-որ հռոմեական դարաշրջանում կատակոմբերում էր մշակվում: Չէ՞ որ կային կատակոմբեր, երբ քրիստոնյաները գոյություն ունեին օֆիցիալ իշխանություններին զուգահեռ: Կատակոմբերի փուլում է, երբ որ զուգահեռ ձեւավորվում է նոր մշակույթ, նոր գաղափարներ կրող մարդիկ, եւ ի վերջո՝ քաղաքական դաս, որը եւ անցնցում իշխանափոխություն է պատրաստում երկրում»:
Չուգասզյանի մեկնաբանմամբ՝ եթե համեմատելու լինենք ոչ հեռավոր անցյալի հետ, մենք կարող ենք հետեւյալն ասել. «Կոմունիստական դարաշրջանի վերջին փուլում կային կամավորներ, որոնք գտնում էին, որ Արցախը հնարավոր է միացնել Հայաստանին, բայց դրան ժողովուրդը չէր հավատում, սակայն այդ ռոմանտիկների մշակած գաղափարները ի վերջո, երբ սկսեցին իրականացվել, ավելի շատ մարդիկ միացան, Ղարաբաղյան շարժումը դարձավ համաժողովրդական: Իսկ սկզբում նրանք ովքե՞ր էին…էլի կատակոմբերում գործող փոքրիկ խմբեր: Մեր պատմությունը ցույց է տվել, թե ինչպես է համաժողովրդական շարժում ծնվում փոքր խմբերից, որոնք լուծում են այս, կամ այն փուլում ժողովրդի համար ամենահիմնական խնդիրները»:
Եվա ՀԱԿՈԲՅԱՆ
