ՀՀ նախագահի նախընտրական շրջանում հնչեցրած հայտարարությունը, որ պետք է դեմքով շրջվել դեպի արդյունաբերողը, իրականություն դարձնելու լավագույն միջոցը կլինի, եթե ստեղծվի արդյունաբերության եւ արտաքին առեւտրի նախարարություն: Այսօր «Փաստարկ» ակումբում նման կարծիք է հայտնել հայրենական ապրանքարտադրողների միության նախագահ Վազգեն Սաֆարյանը:
Aravot.am-ը պարոն Սաֆարյանից հետաքրքրվեց, թե գոնե որեւէ մեկին տեսնո՞ւմ է այդ դեռեւս չծնված, բայց բավականին հստակ ներկայացրած նախարարության նախարար: «Անուններ ասել, դա կնշանակի ոմանց չնկատել, ոմանց էլ` գերագնահատել: Կարեւորը անունը չէ, կարեւորը նախարարության կարգավիճակի ձեւավորումն է: Դա ստանդարտ նախարարություն չի լինելու, այլ ֆունկցիոնալ ճյուղային»:
Նախընտրական շրջանում կուսակցությունների եւ թեկնածուների կատարած ծախսերն արդյոք ներկայումս ինչ-որ ձեւով ժողովրդի գրպանից դուրս չի գալու հարցին, պարոն Սաֆարյանն ասաց. «Նրանք, ովքեր մեծ գումարներ են ծախսել մեծամասնական եւ կուսակցական ընտրությունների ժամանակ, բնականաբար պետք է ինչ-որ ձեւով հետ բերեն: Ասենք՝ նրանք, ովքեր ապրանքային առեւտրով են զբաղվում կամ ծառայություններ են մատուցում: Ես չեմ ուզում մատնանշել թե գործառույթներով հետ կբերեն,
Կարդացեք նաև
որպեսզի դրանից չկառչեն, ու հետո էլ ասեն` այսինչ մարդն էլ էր այդպես ասում: Պարզապես իշխանությունը պիտի շատ խոհեմ քաղաքականություն տանի, որպեսզի այդ մարդկանց կողմից գների ու ծառայությունների թանկացում չլինի»:
Մեր այն հարցին էլ, որ նոր ձեւավորվող ԱԺ-ն արդյոք կաշխատի՞ հայրենական արտադրողների, հատկապես փոքր ու միջին արտադրողների ու արտահանողների օգտին, Վազգեն Սաֆարյանը պատասխանեց. «ՓՄՁ-ի ներկայացուցիչներ չկան ԱԺ-ում, չեն էլ կարող լինել, այնտեղ խոշոր տնտեսվարողներ են ներգրավված: Առաջինը, որ տեղի կունենա պառլամենտում, դա միեւնույն դաշտում աշխատող քաղաքական կուսակցությունների պայքարն է լինելու` այս կամ այն ոլորտներում իրենց իշխանությունը կամ գերիշխանությունը ընդլայնելու ուղղությամբ: Ուստի, տնտեսության զարգացման շեշտադրումները պետք է փնտրել կառավարության գործառույթներում եւ այդ իմաստով, լավ կլիներ կառավարությունը ձեւավորվեր ազգային համերաշխության եւ քաղաքացիական համաձայնության սկզբունքի վրա: Նախարարները պետք է հնարավորինս զերծ լինեն կուսակցական պատկանելիությունից»:
Նելլի ԲԱԲԱՅԱՆ
